Министерот за здравство Венко Филипче кој денес ја посети Општина Новаци изјави дека состојбите во амбулантите посебно во руралните средини е лоша зашто има дефицит на медицински кадар. Тој денес ја посети и амбулантата во Новаци, па со медицинскиот тим таму разговараа за изнаоѓање на решенија за излез од ситуацијата.

„Недостасуваат огромен број на лекари и медицински сестри. Токму за време на посетата на амбулантата во Новаци разговаравме како да направиме стратегија населението да не остане брз здравствена заштита зашто ситуацијата може да биде дополнително полоша во периодот кој следува оти голем број на доктори дополнително ќе заминуваат во пензија. Направени се тимови со Фондот за здравствена заштита и се разгледуваат неколку модели. Наскоро ќе кажеме кој модел ќе биде имплементиран“, рече Филипче. .

Тој најави дека мобилни медицински тимови ќе ги посетуваат амбулантите во руралните средини каде жителите ќе можат да добијат лекарска грижа неколкупати неделно.

„Тој модел би се надополнил и со моделот на мобилна аптека и на тој начин жителите и пациентите во сите рурални и селски средини кои во овој момент немаат на располагање ни доктор ни сестра, неколку пати во неделата ќе бидат посетени“, рече Филипче.