„Три куфери“, вака е насловена најновата серенада која Велчо Петровски-Папал ќе ја пее на годинешното издание на битолскиот фестивал  "Ех таа серенада" 2024.

Композицијата е по текст на Папалот, а музиката и аранжманот ја направи нашиот виртуоз на хармоника професорот Кирил Стојчевски. 

Во песната „Три куфери“, Папалот во староградски битолски манир ќе не „прошета“ од „Солунска“ до „Белградска“ во Битола. 

Велчо Петровски е автор на безвременски текстови и изведувач на сега веќе познати хитови. 

Неговиот долгогодишен пријател и соработник продуцентот Панде Димитровски автор на манифестацијата „Незаборав“ за Папалот вели дека „некогаш знаеше да го предизвика вниманието со добро аранжирани излози низ битолските дуќани, а особено поранешните стоковни куќи во Битола, а во последните децении Папалот  ги осмислува текстовите на сега веќе безвременските хитови каде се јавува и како солист.“

Нема битолчанец да не ги  знае и потпевнува рефрените од песните „Кога сум со сопругата - на пругата“, „Градско точаче“, „Меѓу две реки“...

Фестивалот на битолската серенада "Ех таа серенада" 2024 ќе се одржи на 11 јули, во Офицерскиот дом во Битола, а на него ќе бидат изведени 16 нови композиции. 

А.Б