Во ООУ „Коле Канински“ Битола  со голема свеченост се одбележа еден значаен настан – доделувањето на донација која претставува огромен чекор напред за образованието и развојот на нашите ученици. Оваа донација беше овозможена од Bechtel Corporate, со несебична поддршка од Академијата за роботика и иновации.

„Донацијата ќе придонесе нашето училиште да се вклучи во престижниот натпревар за едукативна роботика, FIRST LEGO League, кој има за цел да ги инспирира учениците кон истражување, иновации и тимска работа. Ова претставува исклучителна можност за нашите ученици да се запознаат со најновите технологии и да ги развијат своите вештини во полето на STEAM образованието (наука, технологија, инженерство, уметност и математика). Преку оваа иницијатива, ќе се создадат услови за поттикнување на иновативното размислување, зголемување на креативноста и развивање на аналитичките способности кај младите. Учеството во натпревари како FIRST LEGO League им овозможува на учениците да работат на реални проекти, да решаваат проблеми преку тимска работа и да стекнат самодоверба во своите способности“, изјави директорката на ООУ „Коле Канински“ Битола Дијана Толевска Христовска.

На свечениот настан покрај директорката на училиштето Дијана Толевска Христовска се обратија претставници од Академијата за роботика и иновации, како и од Bechtel Corporate,заменик градоначалникот Бојан Бојковски кои ја истакнаа важноста на инвестирањето во младите генерации. Тие посочија дека оваа донација не само што ќе го подигне нивото на образованието во училиштето, туку и ќе инспирира нова генерација млади лидери и иноватори.

Настанот заврши со голема благодарност од страна на учениците и наставниците, кои ја препознаа оваа донација како можност за создавање посветла и поуспешна иднина.