Градоначалникот на општина Битола, Тони Коњановски, заедно со одговорните лица од општинската администрација, изврши увид на изградбата на детската градинка во АРМ Четврт 2, со цел согледување на досегашниот напредок на изградбата и интензивирање на динамиката на активностите кои ќе следуваат.

Во досегашниот период, објектот беше изграден до фаза карабина со поставување на надворешна столарија во вредност од 43.437.100 денари, а за заштита на објектот од подземни води беше изведен дренажен систем во вредност од 4.781.739 денари.

Во следната фаза, која ќе продолжи веднаш по подобрувањето на временските услови, ќе започне реализацијата на внатрешните работи, меѓу кои ѕидарски, подополагачки и инсталациски работи, со кои објектот целосно ќе биде завршен, а ќе биде опфатено и партерно уредување, изработка на ограда и потпорен ѕид. Вкупната вредност на инвестицијата за овие работни активности, изнесува 79.594.915 денари.

Со реализацијата на планираните активности, локалната самоуправа, ја потврдува својата заложба за проширување на капацитетите на детските градинки и создавање нови места за згрижување и воспитување на најмладите. Со отворањето на новата детска градинка, значително ќе се намалат и долгогодишните листи на чекање за прием на деца во детските градинки.