Основните и средните училишта во Битола, подготвени се за почетокот на наставата во второто полугодие во учебната 2024/2025 година. Покрај тековните подготовки, продолжуваат и новите инвестиции во училиштата кои се реализираат во соработка со локалната самоуправа и министерството за образование и наука.

Градоначалникот на општина Битола, Тони Коњановски, денес го посети Средното општинско земјоделско училиште „Кузман Шапкарев“, каде со директорот Златко Крстевски, разговараше за инвестициите реализирани во насока на подобрување на условите во училишната зграда, но и набавка на нова ИТ и друга опрема.

Дирeкторот Крстевски, изрази голема благодарност за соработката со општината, како резултат на што реализирана е набавка на нагледни средства од 250.000 денари за практична настава и обука на учениците кои учат на агрономските насоки. Исто така, извршено е реновирање на четири работни простории и два кабинети во вредност од 1.600.000 денари, со што комплетно беа обновени ѕидовите, подовите, таваните, а извршена е промена и на електричната инсталација.

Набавена е и компјутерска опрема во вредност од 70.000 денари, како и набавка на училишен инвентар во износ од 65.000 денари.

Градоначалникот Коњановски, нагласи дека, покрај во ова училиште, се работи на подобрување на условите и во другите училишта, а веќе се прават подготовки и за реализација на нови проекти за изградба и реконструкција на спортски игралишта и сали во состав на воспитно – образовните установи во општината.