СВР Битола испрати демант до медиумите во кој известува дека возилото на битолчанецот Д.Ц, инаку се однесува на Димитар Црномаров, поранешен висок полициски службеник, не е намерно опожарено како што пишуваат одредени интернет портали. Возилото на Црномаров беше опожарено во неделата, за што полицијата веќе даде официјална информација. Денеска во демантот до медиумите стои - "Секторот за внатрешни работи Битола ги демантира дезинформациите објавени во дел од порталите и на социјалните мрежи за наводно намерно опожарување на патничко возило во сопственост на Д.Ц.(73) од Битола. Ја информираме јавноста дека на 24.08.2025 во 01:38 часот во СВР Битола во својство на пријавител Д.Ц.(73) од Битола пријави дека, додека го паркирал своето патничко возило „опел омега“ на ул.„Солунска” во Битола, тоа се запалило во предниот дел и почнало да гори. Пожарот е изгаснат од екипа на Територијалната противпожарна единица Битола, а увид изврши увидна екипа на СВР Битола. Апелираме да не се шират дезинформации со кои се вознемируваат граѓаните, се вели во информацијата на полицијата. Инаку дел од интернет порталите со цело име и презиме објавија дека намерно е запален автомобилот на Димитар Црномаров. "Трибуна" објави дека  од фамилијата Црномарови се сомневаат дека се работи за намерно предизвикан пожар.

„Се сомневаме дека инцидентот со автомобилот не е случаен, бидејќи истиот макар и стар, беше во одлична техничка состојба“, изјавил за  портал член на фамилијата Црномарови, објави "Трибуна".