Градоначалникот на општина Битола, Тони Коњановски, денес го посети општинското средно медицинско училиште „Д-р Јован Калаузи“, каде имаше средба со директорот Горан Талевски и дел од вработените во училиштето. На средбата се разговараше за новите инвестиции кои ќе се реализираат со почетокот на новата година, а за кои активностите се веќе започнати.

Согласно склучениот договор со изведувачот, започнаа подготовките за реконструкција на спортската сала во ОСМУ „Д-р Јован Калаузи“, каде извршена е демонтажа на постоечките справи за вежбање и голови и ќе биде наместен нов комплетен повеќеслоен спортски под, со еластична подлога, изработен според ИСО стандарди за квалитет, со завршна обработка дрво, посебно погоден за кошарка со сите подслоеви потребни за подот. Теренот ќе биде обележан за кошарка, ракомет и одбојка, со соодветни материјали, според сите стандарди за секој вид спорт. Вкупната инвестиција за спортската сала изнесува 5 642 406 денари, а ќе биде извршена и интевенција на кровната конструкција во износ од 306 800 денари.

Крајниот рок за реализација на планираните активности е крајот на месец февруари.

Градоначалникот и директорот на училиштето, разговараа и за целосната реконструкција на наставничката канцеларија во училиштето, за која е издвоена сума во износ од 535 725 денари, за што краен рок на реализација е крајот на месец јануари.

Градоначалникот Коњановски, потенцираше дека ваквите проекти, спроведени во координација со училиштата, се дел од заложбите на локалната самоуправа за создавање на подобри услови за учење и спортски активности на учениците.