Во рамките на одбележувањето 80 години настава на современ македонски јазик, денеска во 20 часот во Центарот за култура во Битола ќе бидат прикажани два уметничко - документарни филма снимени од ученици од Горната гимназија.

„Неговиот глас“ под менторство на професорот Никола Трајковски и „Прекршени времиња“ под менторство на професорката Софија Бејковска. Претходно во 19 часот ќе биде отворена изложбата „Идни спомени“ од ученичката Дамијана Ристевска. 

„Учениците од прво 6 за прв пат  подготвија проект со цел да се прикаже минатото и сегашноста и борбата за македонскиот идентитет и национална свест. Филмот е насловен ‘Прекршени времиња’, таквата е сликата која што ја оставаме денес за македонската национална свест и македонскиот јазик. Децата изненадија со нивната креативност“, изјави професорката Бејковска.  

Во филмот – „Неговиот глас“ зборуваат двајцата академици, поранешни ученици во Горната гимназија, Владо Камбовски и Живко Попов, како и интервјуа на познати лекари, професори, актери… кои учеле во гимназијата.  

„Овој филм е своевидно патување низ времето, прераскажува приказни од минатото, на академици, професори од гимназијата, на значајни личности во општеството кои ја поминале младоста во гимназијата и ги раскажуваат своите искуства, спомените од средношколски денови. Актери во филмот се доајенот на битолското глумиште Борис Чоревски и нашиот ученик Борис Граматковски. Овој филм е глас што тивко говори за нас, а силно одекнува низ просторот и времето“, рече професорот Трајковски.