Александра Радевска останува претседател на Управниот одбор на Стопанска банка Битола. Одлуката на Надзорниот одбор за нејзниот реизбор доби и потврда со согласноста дадена од Народната банка.

„Врз основа на Одлука од Надзорен одбор бр. 02-2348/1/II-27 од 26 февруари 2025 година и Решение за издавање претходна согласност од Народна банка на Република Северна Македонија бр. 15-10112/9 од 3 јуни 2025 година, за член и претседател на Управен одбор на Стопанска банка а.д. Битола повторно е именувана  Александра Радевска“, соопштија од битолската банка  преку Македонска берза.

Радевска, во Управниот одбор со кој и натаму ќе раководи, членува веќе две години – од јуни 2023, а на претседателската позиција првпат беше именувана во номeври истата година. Дипломираниот економист има големо работно искуство. Со Стопанска банка Битола професионално е поврзана 12 години, од кои една деценија била дел од Надзорниот одбор, а од 2019 е и во Одборот за ревизија. Одговорна е за секторите за контрола на усогласеност на Банката со прописите и спречување перење пари и финансирање тероризам, за управување со инвестиции и имот и за правни работи и решавање проблематични пласмани.