Комуналната инспекција од Општина Битола казни жена што фрлаше ѓубре на јавна површина, откако „АПЛА“ објави видео на кое се гледа дека две жени од автомобил изнесуваат и фрлаат отпад на површина пред контејнери на плац зад Новиот Пазар во Битола. На видеото  https://www.facebook.com/share/v/1AiNmE8fAL/ кое ни го прати граѓанин, се гледа јасно дека двете жени брзаат да го изнесат ѓубрето и наместо да најдат место да го стават во неколкуте контејнери пред нив, тие го фрлаат на земја пред големите канти за ѓубре. Дури една од жените вади од колата ѓубре и од подалеку го фрла. Видеото предизвика бурна реакција кај граѓаните, кои побараа казни за сторителиte. 

Комуналниот инспектор при Општина Битола денеска бил на увид и лоцирал една од  двете жени. 

-Општина Битола го лоцира сторителот, утрово од страна на инспекторатот изготвен е записник и издаден е прекршочен платен налог согласно Законот за јавна чистота, изјавија од Општина Битола за „АПЛА“

Една од жените на видеото, синоќа, преку порака до АПЛА побара да се отстрани видеото и се закани со тужба за медиумот.

-Тргнете ја објавата со колата, со ѓубрето, имам тезга во Новиот пазар, го чистев ѓубрето бидејќи нема чистач, на одмор е и зад тезгите е депонија. Моравме да фрлиме гајби и друго ѓубре во вреќи за што имам доказ. Ќе ве тужам ако не се тргни видеото. Ќе се разбереме на суд, јас имам докази. Ние плаќаме тезги и за нас се контејнерите во Новиот пазар, напиша засегнатата во пораката до медиумот. 

„АПЛА“ возврати -„Утре ќе пријавам во Комунална инспекција, со нив ќе се разберете. Слободно тужете.“ 

https://www.facebook.com/share/v/1AiNmE8fAL/

А.Блажевска