Куќата што се сруши зад зградата "ЈАТ" во центарот на Битола е во сопственост на познати битолски бизнисмени од градот што работат и угостителство, дознава АПЛА. Правниот застапник на сопствениците, битолскиот адвокат Вања Атанасов вели дека на објектот имало предупредување од можност од одрони. Рушењето на голем дел од куќата се случи денеска по 14 часот и оштети неколку паркирани автомобили. Адвокатот Атанасов за AПЛА потврди дека објектот е во приватна сопственост и во моментов е со вешто лице на местото на настанот со цел да се направи стручен увид на состојбата.  "Објектот е во приватна сопственост, беше во лоша состојба за што сопствениците имаа ставено предупредување на табла закачена на ѕидот да не се паркира во тој дел. Сега со вешто лице ќе мора да се утврди состојбата и да се вештачи причината за рушењето. Дали има дополнителни причини за нарушување на стабилноста на објектот, изјави за АПЛА адвокатот Вања Атанасов, кој ни испрати фотографии од состојбата на објектот пред да се сруши.  Текст Анета Блажевска