АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Битолската поетеса Белинда Сипкоска - Гаштарова ја издаде својата прва книга "Помеѓу мразот, огнот и срцето". Средствата собрани од продажбата на книгата ќе бидат донирани за лекување на децата од Кочани. Авторката раскажува -Долго време во мене тлееше желбата да објавам книга, но не рекле за џабе дека сѐ се случува тогаш кога ќе му дојде вистинското време. За мене вистинското време беше времето после патувањето на Исланд.
Фактот што се впуштив надвор од познатиот удобен живот и се ставив на место во кое нема ништо од вообичаеното, ми овозможи одново да се родам и одново да творам.
Во таа земја на мраз и оган, на тишина и силна енергија, во мене се отвори поетски циклус кој што стана иницијална каписла за оваа книга. Токму од тој прв циклус започна идејата за „Помеѓу мразот, огнот и срцето“. Оваа книга за мене е еден вид созревање – поетско и човечко. Таа е место каде што се среќаваат љубовта, женскиот идентитет, прашањата без брзи одговори и вербата дека секој од нас во себе носи свој таен град, во кој стиховите го наоѓаат својот дом", изјави Сипкоска-Гаштарова за Апла. 
Белинда Сипкоска Гаштарова е родена 1970 година во Битола. И во осмолетка и во средно беше омилена ученичка на професорите по македонски Катерина, Блага и Олга. По струка е дипломиран инженер биолог, со специјализација од областа на микробиологијата. Работи на струката. Среќна мајка на една Ана. Го обожува петокот, денот кога најмногу пишува. Освен што пишува, многу чита, многу патува, пее во поп-рок хор и сака барем уште еднаш во животот да оди на Исланд. Нејзиното животно мото е: „Дај ми хоризонт, ќе ти дадам насмевка.“ Нејзините песни, кратки раскази и бајки наградувани се на домашни и меѓународни конкурси и објавувани се во многу антологии. 
На промоцијата во Битола поезијата ја читаше Лина Трампевска. Водител на промоцијата: Анета Христова. Промотори: проф. Елизабета Јончиќ и проф. Билјана Котевска Димко. Рецезент: Ана Кондоклоцис 
На промоцијата во Битола поезијата ја читаше Лина Трампевска. Водител на промоцијата: Анета Христова. Промотори: проф. Елизабета Јончиќ и проф. Билјана Котевска Димко. Рецезент: Ана Кондоклоцис 