Битола - Како деца плачат сточари од пелагониското село Суводол раскажувајќи каков страв имаат од глутница кучиња скитници, повеќе од педесеттина на број, кои им ги напаѓаат стадата овци, пишува Анета Блажевска за Зелена берза zelenaberza.com.mk.

фото Зелена берза

Кучињата се лоцирани околу дивата пелагонска депонија Мегленци, а во потрага по храна ги напаѓаат трлата. Според мештаните кучињата веќе делуваат како диви животни и засега никој не се обидува да го реши проблемот. Сточарите со петарди едвај ги бркаат од бачилата, но не успеваат секогаш. За жал лани само на двајца сточари им задавиле и до коски изеле 25 овци. Една овци чини над 200 евра, велат сточарите. Глутницата кучиња напаѓала и телиња од соседните сточари. Сточарите велат дека кучињата се движат низ поголем реон во Мариовско, до атарите на селата Орехово и од другата страна Арматуш, напаѓајќи и трла со овци и фарми со крави.

фото Зелена берза

Менде Божиновски (65) сточар од Суводол за „Зелена берза“ раскажува дека вчера едвај се спасил самиот тој и стадото овци пукајќи педарди, откако глутницата кучиња повторно го нападнале стадото.

„Вчера едвај спасив жива глава и ги сочувава овците, кучињата над педесеттина на број замина кон копот на РЕК ‘Битола’ во потрга по плен“,сведочи сточарот Менде и плаче.

Лани кучињата задавиле 8 овци во трлото на Божиновски.

„Вчера ме нападна глутница кучиња, не се плашат ни од моите овчарски кучиња. Три пати ме нападнаа па се повлекуваа. Едвај куртулив. Чувам 100 овци на два километри од депонијата Мегленци во село Суводол. Куќата ми е на патот и постојано имам напади од глутницата кучиња. Порано со родителите чувавме 400 глави овци, ама сега со кучињата не знам што да правам дали да продолжам да одгледувам или да продадам се. Неиздржливо е“, изјави Божиновски за „Зелена берза“.

Сточарот Дејан Атанасовски (45) од Суводол вели дека од дваесет овци кои ги чувал со години, лани кон крајот на септември, кучињата скитници му задавиле и изеле дури 17 овци. Сега повторно купил овци за да не го затвора трлото, но штета е над 3.500 евра не може да ја надомести.

фото Зелена берза

„Глетката беше ужасна дел од овците беа до коски изедени, само главата оставена. Жално е, ги чуваме овците како наши деца, тие требаше да дадат јагниња. Но, кучињата направија касапаана. Ги имам сите докази од давењето на овците, секаде пријавив никој не е надлежен да ми ја надомести штетата. Дојде полиција со вешти лица направија записник, ама чаре за кучињата не се најде. Живееме со страв“, вели Дејан Атанасовски за „Зелена берза“.

Општина Новаци засега нема начин како да го реши проблемот со кучињата скитници на дивата депонија Мегленци. Единствениот излезе од ситуацијата го гледа во изградба на новиот центар за управување со цврст отпад, што веќе се најавува за Пелагонија.

фото Зелена берза

Градоначалникот на Општина Новаци, Стевче Стевановски вели дека на добра волја донесле одлука на Советот на Општина Новаци овие сточари да бидат обесштетени со по 20.000 денари. Тие како општина имале организиран третман на бездомни кучиња, за заловување и соодветно третирање, но проблемот со Мегленци засега не може да се надмине, зошто таму постојано се носат и се оставаат кучиња од други места.

„На ѓубриштето Мегленци има кучиња од секаде, ги носат и ги оставаат. Таму имаат пристап до храна, се размножуваат и веќе делуваат како диви животни организирани во глутници. Како општина не сме во можност да го надминеме проблемот, единстевниот начин е изградбата на центарот за управување со цврст отпад. Дури потоа се надевам дека ќе имаме успех во тој дел“, изјави Стевановски за „Зелена берза“.

фото Зелена берза 

Анета Блажевска за Зелена берза