На барање на СОТУ "Ѓорѓи Наумов"-Битола , ЈКП "Нискоградба" постави тампон слој со кој се олеснува движењето на учениците и граѓаните кои го користат дворот на училиштето како шеталиште и скратен пат до Новиот градски пазар  во дождливите денови.

Искрена благодарност до јавното претпријатие „Нискоградба“, вели директорот на Техничкото училиште Владимир Роме.

Техничкото училиште од Битола денеска упати писма до Одделението  за комунални дејности до Општина Битола и јавните претпријатија „Пазари“ и „Комуналец“ да се најде заедничко решение на проблемот. Училиштето бара начин како да изнајде решение за отпадот кој се создава од страна на пазарџиите кои го користат паркинг просторот на Новиот градски пазар како простор за тезги на отворено.

-Имено непосредно до дворот на СОТУ „Ѓорѓи Наумов“ се лоцирани импровизирани тезги на пазарџии кои продаваат земјоделски производи. Во летниот период тука се продаваат лубеници и грозје, а пазарџиите околниот простор го користат за фрлање отпадоци и вршење нужда. Дворот на нашето училиште во кое учат 680 ученици е во непосредна близина на новиот градски пазар и истиот од страна на жителите на околните згради се користи како скратен пат за нивно одење до градскиот пазар, наведуваат од школото.

ОД ЈКП „Комуналец“,пак училиштето побара  да се зголеми бројот на контејнери за отпад на паркингот кај новиот градски пазар доколку постоечкиот не е доволен за отпадот што го создаваат пазарџиите.

Претходно училиштето со општината , јавните претпријатија  и Ротари клубот учествуваат во чистење на овој простор од сметот, но несовесните пазарџии не дозволуваа да биде чисто повеќе од еден ден. Од Техничкото училиште апелираат за изрекување на казни  од страна на комуналната инспекција.

По наглото топење на снегот и порастот на температурите се поплавија подрумските кабинети во техничкото училиште СОТУ „Ѓорѓи Наумов“-Битола за што апла.мк објавува и низа фотографии . Причина за ваквата хаварија  најверојатно е понирање на вода во подрумот која  е резултат на оштетна атмосферска канализација или пак евентуално постоење на подземни води. Објектот на училиштето во континуитет тони во земјата што може веќе да се забележи и со голо око. Тонењето на објектот е отприлика од 10 до 20 сантиметри во зависност од позициите. Од раководството на школото велат дека денеска се соочуваат со поплавени кабинети за практична настава како и пропаѓање на дел од подовите кои се со мермерни плочки.

Дел од превозниците опфатени со бесплатниот школски превоз, преку нотар  им испратиле  на средните  општински училишта  во Битола решенија за наплата на фактурите за извршените услуги.

Училиштата пред извесен период прекинаа да им ги плаќаат фактурите на превозниците и ангажираа адвокат кој ќе ги застапува на суд.

-Согласно измените што се направени во Законот за сообраќај и превоз на патници , а се применуваат од 3 септември 2018 година, ( а со Одлука на Совет од 31 јули 2018) сите патници се изедначени, што значи и ученикот е патник. Ова подразбира дека е нелогично учениците да плаќаат неколкупати поскап билет за превоз од секој друг патник кога сите се возат заедно во ист автобус. Дел од превозниците во фискалните сметки од неодамна вметнуваат 47 проценти попуст со што наведената  цена од 76 денари на релација Битола-село Кравари ја сведуваат на 40 денари, а на училиштата им фактурираат цена од 76 денари, што е неприфатливо. Нелогично е за иста услуга да се плаќаат различни цени на билетите, вели директорот на СОТУ „Ѓорѓи Наумов“-Битола, Владимир Роме.

Директорката на СОУ „Таки Даскало“ Елизабета Наумовска смета дека неправедно е учениците кои се возат во истите автобуси во јавниот превоз години назад да бидат третирани различно од другите патници, дотолку повеќе што со таквите високи цени беше предизвикан  финансиски колапс на училиштата, што како состојба ја затекнаа новите раководства  при преземањето на локалната власт.

Во СОТУ „Ѓорѓи Наумов“оваа учебна година е отворен нов кабинет за микро-контролери и микро-компјутери за кој училиштето,како донација, доби дидактичка опрема од компанијата „Логинг Електроникс“ од Скопје.

Донацијата се состои од повеќе „Ардуино“ развојни микро- процесорски системи кои значително ќе ја осовременат наставата по стручните предмети за образовните профили електротехничар за електроника и телекомуникации и електротехничар за компјутерска техника и автоматика. Со оваа донација училиштето ќе биде во чекор со современите технолошки трендови што сигурно уште повеќе ќе го привлече интересот на младите генерации да го изберат стручното образование како своја иднина.

Ваквите активности помеѓу СОТУ „Ѓорѓи Наумов“ и  ДОО „Логинг Електроникс“ се резултат на потпишаниот меморандум за соработка од 16 мај 2018 г. од страна на Златко Крстевски, генерален менаџер на „Логинг Електроникс“, и в.д. директорот на СОТУ Ѓорѓи Наумов, Владимир Роме.Наведената донација е реализирана во рамките на акцијата „Технологија за тебе“ која ДОО „Логинг Електроникс“– Скопје ја спроведува со цел да помогне во образовниот развој на средношколците од електротехничката струка. Од СОТУ „Ѓорѓи Наумов“изразуваат благодарност за донираната опрема која на учениците им овозможува да бидат во тек со употребата на новите технолошки уреди во брзорастечкиот свет на напредните технологии.

На овој начин раководниот тим на Училиштето го продолжува воспоставениот тренд на модернизација и афирмација на оваа образовна институција која има водечка улога во сферата на средното образование за техничките струки во регионот.

Реконструкцијата и санацијата на водоводната и одводната мрежа во Техничкото училиште во Битола што започна за време на летниот распуст отвори многу работа , откако фактичката состојба покажа дека се е зарѓено, испукано и дотраено.

Цели 32 години од изградбата на школото никој не ставил рака да го обнови и санира, па сега кај и да копнат мајсторите се соочуваат со тотален распад.

Директорот на средното техничко училиште „Ѓорѓи Наумов“,  Владимир Роме, и претходно изјави дека училиштето во оваа зграда опстојува од 1986 година и од тогаш до сега ништо не е сменето и реновирано, особено не, во водоводот и одводот.