„Денешниот настан не е само да се потсетиме на жртвите туку и да ги повикаме сите надлежни институдии, но и сите поединци за одговорно, будно и свесно учество во сообраќајот. Светската здравствена организација кажува дека втора од причините за смртност се токму сообрајните несреќи на учениците од 10 до 14 и на младите од 20 до 24 години. Најчестата причина за несреќите е големите брзини, конзумирањето на алкохол, непочитувањето на прописите“, рече Јасмина Талевска, претседател од Советот за безбедност во сообраќајот во општина Битола.

Иванчо Тошевски, претседател на Комисијата за безбедност во сообраќајот во општина Битола рече дека расте бројот на сообраќајќи во населени места и потребно е да се преземат мерки на превенција.

„Поразителен е фактот што бројот на сообраќајни несреќи расте секоја година се повеќе и повеќе и тоа во населените места, па и последиците се поголеми. Според извештајот од СВР Битола како најчести причини за сообраќајни несреќи во населните места се слабата вертикална и хоризонтална сигнализација. Во соработка со Општинскиот совет за безбедност во сообраќајот и Комисијата за безбедност и други лица беа изготвени 100 мерки за безбедност во сообраќајот, но од мнозинството во Советот беа отфрлени“, рече Тошевски.

Овој ден на сеќавање на жртвите од сообраќајни несреќи се одбележува низ многу држави. Во Битола беа вклучени основните училишта „Гоце Делчев, ликовната секција од „Даме Груев“ и „Коле Канински“. Во Битолската библиотека беа изложени повеќе од 60 детски ликовни творби на тема безбедност во сообраќајот, се одржа и литературно читање, а ученици од Музичкото училиште настапија со музички точки. Беше потпишан и договор за изработка на мотоциклистички кодекс, како и договори за формирање на сообраќајни улилишни единици со цел поголема безбедност на децата во сообраќајот.

Се одбележаа и 30 години од формирањето на училишната сообраќајна единица при СОУ„Таки Даскало“.

„Уште пред 30 години се јави идеја за формирање на сообраќајна училишна единица во СОУ ‘Таки Даскало’ во Битола заедно со Министерството за внатрешни работи. Оваа училишна сообраќајна единица работи ефективно и продуктивно 30 години, секојдневно, таму каде што има потреба. За жал, кај нас сообраќајната култура е на многу ниско ниво. Учениците заедно со овластените лица од СВР Битоа одат во училиштата и градинките држат предавања. Често пати одат на пешачки премини и крстосници каде им помагаат на малите деца да ги совладаат правилата и прописите“, Гордана Кожуваровска професор во „Таки Даскало“.