Но 5 години потоа овој член 102 ги уништи токму најмалите, односно регионалните и локалните медиуми. Оние големите си продолжија да си бидат дил ориентед, така што да не се лажеме дека преку разни други канали не продолжија да си се финансираат, на ваков или таков начин.

 

Малите медиуми, кои егзистираат во средините надвор од Скопје, преживуваат од ден за ден и се оставени да се финансираат од локалниот бизнис сектор. Односно оставени се на милост и немилост и питачење по приватните компании и разно разни локални моќници кои им потфрлаат по некој денар. Жива мизерија!

 

Наместо кога ќе тропнеме на маса да се тресат општините и сите околу нас, локалните медиуми се доведени до питачки стап и секој чека само да го стават клучот на врата бидејќи слободни и независни медиуми не му се потребни на никого. Си ги имаат тие нивните профили на социјалните мрежи и партиските порталчиња.

 

Е сега да се вратиме на член 102. Во последно време има некоја иницијатива да се олабават овие мерки, па ЗНМ и други организации веднаш излегоа со став дека се против тоа, бидејќи повторно ќе се вратела контролата врз медиумите.

 

Како прво тоа не е точно. Ако парите од некоја кампања се поделат по сите локални медиуми во некој град, според одреден критериум, тоа не е поткуп. Оти сто пати имам напишано, тоа не се пари на партиите или на градоначалникот. Тоа се народни пари, што народот плаќа данок и граѓаните заслужуваат објективно, навремено и точно информирање. И во краен случај тоа воопшто нема да бидат астрономски суми како во минатото, туку ситни пари за објава на соопштенија и други огласи. И никој нема да може да поткупи медиум ако тие пари и онака му следуваат на медиумот.

 

Па би го запрашал ЗНМ и другите, ако сметаат дека ова ќе биде поткуп, зошто досега и покрај сите укажувања дека ќе затвориме не најдовте решение во овие 5-6 години како да им се помогне на локалните и регионални медиуми. Лесно ви е вас да функционирате со проекти од стотици илјади евра финансирани од странски амбасади, ЕУ, САД, и други донатори. Но локалните медиуми ниту се невладини организации, ниту знаат да пишуваат проекти. Ние сме медиуми! Токму затоа треба да ни помогме пред се нашата држава. А за проекти од странски донатори ајде помогнете ни Вие, зошто функционирате како здруженија воопшто ако за ништо ни немате помогнато!

 

Токму затоа под итно е потребно формирање на одреден Фонд за помош на локалните и регионални медиуми. Медиуми кои се занимаваат со секојдневните проблеми на малиот човек, оние проблеми кои немаат можност да дојдат на националните медиуми, оти нели тие се резервирани само за Таче, Мицко, ВМРО и СДСМ друго и нема.

Затоа ЗНМ малку повеќе да се позанимава и тоа под итно со новинарите надвор од Скопје, да се види како тие живеат, од што егзистираат, а не само да се прават проектчиња од еден тон пари, од кој никој не видел аир освен тие шо се вклучени во него.

 

Значи или измена на член 102 и изземање на некаков начин од него на локалните и регионални медиуми или најдете друго решение под итно. Не смее да се дозволи затворање на медиумите!

 

Дарко Штарговски, новинар