„Протоколите за организирање на културни настани поради ковид-19 нѐ носат во прекрасниот простор на Завод и музеј во Пациото каде ќе можат да се пополнат околу 300 седишта, а битолската публика ќе може да проследи три прекрасни концерти, има најава и за гости од други градови. Најактуелните моментално, но и во последните десетина години македонски групи ‘Чалгија саунд систем’ имаат ново издание кое во Битола не е промовирано, ‘Баклава’ кои имаат нов албум кој кај нас не е отсвирен и ‘Љубојна’ кои имаат нов материјал“, рече Тоше Ивановски, организатор на „Локум фест“.

Покрај музичките настапи, ќе се одржи и Саем на ракотворби на Магнолија. За жал, годинава поради околностите со пандемијата, спонзорот на локуми се повлече, па локуми може само симболично да има на фестивалот.

„Локум фест е средба на културите кои битисувале овде. Веќе 14 години се обидуваме традицијата да ја држиме актуелна и будна, да ја потенцираме како наше важно културно наследство кое може да има и туристичка употребна вредност, да биде еден препознатлив атрибут на културната понуда. Важен е за културниот туризам за што Битола верувам дека допрва ќе развива стратегија имајќи го во предвид тоа како се движат работите и со Офицерскиот дом“, рече Ивановски.

Инаку „Локум фест“ е поддржан од Министерство за култура и Општина Битола. За в година, за 15 издание најавено е дека ќе биде отворено со настап на Влатко Стефановски.