На првиот училиштен ден, градоначалничката Наташа Петровска го посети ОУ „Коле Канински“, каде го следеше текот на спроведувањето на протоколите за изведување на настава со физичко присуство за учениците од прво и второ одделение.

Градоначалничката, заедно со директорот Зоран Мирчевски и вработените од училиштето им посакаа добредојде на учениците, потсетувајќи ги на протоколите што мора да се запазат. Двата влеза од училиштето беа наменети за влегување на учениците од прво и второ одделение, со мерење на температура, дезинфекција на рацете и држење растојание од 2 метри.

Градоначалничката ги посети и училниците опремени со компјутери и интернет каде ќе се спроведува онлајн настава за учениците од четврто до деветто одделение.

- Ви посакувам добро здравје, слушајте ги наставниците и домашните. Тоа е важно во овие околности. Ви посакувам да станете големи луѓе, посебно затоа што се соочувате со големи предизвици од толку мала возраст - им порача Петровска на учениците.

- Сакам да ви посакам добредојде на сите деца. Оваа година имаме голем предизвик со кој треба да се соочиме, не само во нашиот град туку и во нашата држава и целиот свет. Се надевам дека сите заедно ќе се исправиме пред предизвикот и учебната година ќе се одвива според сите зададени протоколи - рече директорот Мирчевски.