Суденото време не ги поколеба битолчани да излезат на вообичаената вечерна прошетка на Широк Сокак. Снегот го исчисти воздухот на задоволство на сите. Па една „волта“ од плоштадот  Магнолија до Шеталиште не е на одмет велат повозрасните , додека помладите ги обиколуваат продавниците и кафичите на најпрометната улица во градот.

Денеска е пазарен ден во Битола, а тезгите на Градскиот зелен пазар тежат од свежи земјоделски производи, зеленчук и овошје. Повозрасните битолчани пазаруваат , додека помладите  го пијат претпладневното кафе на Широк Сокак и уживаат во прошетките на Градското шеталиште.

Студот, снегот и маглата на овој битолчанец не му можат ништо. Тој денеска се прошета по Широк Сокак по куси панталони и ракави, спремен за џогирање, како на среде лето.

Широк Сокак е исчистен од снегот и прооден, а битолчани и покрај студеното време повторно на кафе или на прошетка на чист воздух. Врнежите снег преку ден ги паднаа и концентрациите на ПМ 10 честичките во воздухот. Двете мерни станици во центарот и периферијата на градот денес измерија присуство на ситни суспендирани честики под дозволениот максимум. Тешко дека ваквиот тренд ќе остане и вечерва кога ќе се разгорат ќумбињата.

Симеон Бундалевски ја донел електричната светлината во Битола уште пред 94 години. Овој битолски Никола Тесла немал ни дозавршено технички факултет, но успеал градот да го електрифицира во 1924 година, само три-четири лета по Скопје. Неговата заслуга е уште поголема зашто може да се каже дека минал низ иглени уши за да изгради првата битолска електроцентрала. Породилните маки на битолска Дистрибуција од пред еден век слични се на некои настани од поновата историја. И во тоа време имало корупција, алчност и опструкции.