Во продолжение и дел од разговорот што деновиве го направивме со Коруновска, а поводот беше токму дебитантскиот настап на поп рок хорот Битвокс

Битола е град на конзулите, град на филмот, град на културата, но и град на музиката. Во овој град се родиле големи музички имиња. Но, изминатава година беше создаден уште еден музички проект на кој Битола може да биде и тоа како горда: новиот поп-рок хор „Bitvox“.

- Идејата потекнува одамна, уште пред пандемијата, но чекавме да се создадат услови за да може да се реализира. Во декември 2021 година, во школата „Korunovska music & singing“ ни се приклучи познатиот рок-пејач и гитарист од нашиот град, Михајло Трајковски - Сак, кој ни даде дополнителен стимул да ја реализираме идејата. Веднаш по Нова година се мобилизиравме со подготовки и осмислување на проектот - вели Марина Коруновска, еден од основачите на хорот „Bitvox“.

Постојат класични и детски хорови, но застапеноста на поп-рок музиката во хорските изведби скоро и да не постои или е многу ретка, па затоа најголем мотив за реализацијата на овој проект беше да се биде дел од нешто ново и оригинално, а воедно и да се негува љубовта кон овој жанр на музика, додава Коруновска.

По подготовките беше одржана аудиција, и во март 2022 година хорот започна со работа.

Одличната позитивна енергија и музиката ги синхронизира хористите

Во хорот членуваат 25 членови и се состануваат еднаш неделно, по два часа. Пробите започнуваат со распевање, вокална техника, вежби за дишење и дикција. Вклучени се и вежби за опуштање и релаксација со светски методи на музикотерапија и вокалотерапија.

- Откако ќе завршиме со сите вежби, почнуваме со разработување на музичките аранжмани по гласови, кои ги реализира мојот соработник Александра Ристовска, во придружба на пијано и гитара - вели Коруновска.

Член може да биде секој што е заљубен во музиката

Енергијата за време на пробите е на високо ниво и хористите уживаат додека пеaт и вежбаат. Мотивот е очигледен: огромната желба за пеење и љубовта кон музиката.

- Поаѓаме од мотото: „Негувај го детето во себе“ и таа енергија ја пренесуваме на нашите хористи. На тој начин го поттикнуваме секој од нив да допре далбоко во себе, да го пронајде детето во себе и да ја изрази својата (детска) среќа, сон и желба. Затоа, впрочем се возрасни деца.

За тоа кој може да членува во хорот, Коруновска вели, секој што е вљубен во музиката, има желба за пеење и основна музикалност. Кандидатите не мора да имаат познавање на музичка нотација, затоа што аранжманите ги прават токму тие, спонтано и во склоп на пробите, без нотни партитури.