Градоначалникот на општина Битола Тони Коњановски оствари работна средба со амбасадорката на Црна Гора во земјава н.е. Марија Петровиќ и почесниот конзул на Црна Гора Милорад Андријашевиќ.

На средбата, соговорниците изразија взаемно задоволство од досегашната соработка во сите сфери, особено на културната размена. Градоначалникот посочи дека општина Битола е особено горда на одличните релации кои што ги има со двата збратимени градови од Црна Гора, Херцег Нови и Цетиње, со кои, покрај културните врски, се запазуваат и посетите за време на празниците на градовите, каде што се разменуваат искуства и се отвораат можности за натамошна економска соработка.

Амбасадорката Петровиќ истакна дека е многу задоволна од соработката со општина Битола, а во тоа голема улога има и почесниот конзулат на Црна Гора во земјава и почесниот конзул Милорад Андријашевиќ, кои со проактивното делување, ги зацврстуваат меѓусебните блиски односи.