![logog.png](/images/2023/01/02/logog.png)
АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Во рамките на проектот „Младински активизам против корупцијата“, на ЦСИД Форум, денеска се организираше работилницата на тема “Со транспарентност против корупција“, на која беше презентирано истражување за тоа како општините ги користат средствата од надоместокот за производство на електрична енергија од фосилни горива. Ова истражување покажа дека Владата доцни во распределбата на парите, а општините овие средства најчесто ги користат за инфраструктурни проекти за кои донеле програми, а за нивна реализација користеле и сопствени средства во случај кога наменските дотации не биле доволни.
Во истражувањето се опфатени распределбата на средствата за 2019, 2020 и 2021 година, а информациите за потребите на проектот се добиени преку слободен пристап до информации.
Па така, Општина Битола средствата во висина од над 240 илјади евра за 2020 година, ги искористила во 2022 година за изградба на колектор за фекални води во Брусник, реконструкција на фекална канализација на улиците Стара чешма и Македонска фаланга, а средствата за изградба на фекална канализација во Касарната ги пренаменила за изградба на секундарна мрежа за колекторот Бегова чешма.
И средствата од 2021 година во висна од 11 милиони и 300 илјади денари Општина Битола ги искористила во 2023, за изградба на фекална канализација во село Трнови и реконструкција на фекалните канализации на улиците Драгорска, Зборска и Стив Наумов.
Општина Могила со средствата добиени за надоместок од производството на енергија од фосилни горива тампонира полски патишта низ населените места
Општина Новаци е единствената која не испрати одговор во законскиот рок и со тоа постапи спротивно на Законот за слободен пристап до информации од јавен карактер.
Владата не донела одлука за распределба на средства по основ на надоместокот за производство на енергија од фосилни горива, како наменски дотации на општините за 2022 и 2023 година, се наведува во извештајот од истражувањето во рамките на проектот „Младински активизам против корупцијата“ во кое беа вклучени, Леонид Ташовски, Мирко Наумовски и Филип Етмишовски. .
Што се информации од јавен карактер, како и од кого да ги побарата, на обуката зборуваше Петар Гајдов, државен советник од Агенцијата за заштита на правото за слободен пристап до информации од јавен карактер, а дописничката на ТВ Телма и новинар во порталот апла.мк Емилија Мисирлиевска, ги сподели своите искуства за улогата на медиумите во подигање на јавната свест за постоењето на проблемот со корупцијата, причините и последиците од неа.
Е.Мисирлиевска