Три тинејџерки од Битола од кои едната малолетна се степале пред ноќен клуб популарен во градот, во близина на Градското шеталиште. Девојките го нарушиле јавниот ред и мир казниво со закон, а тепачката е снимена и видеото кружи на социјалните мрежи. Две од девојките се на 18 годишна возраст, но третата има 17 години. На снимката се гледа како девојките се тепаат меѓу себе, најверојатно  две наспроти една, а ги делат лица  од обезбедувањето на клубот, со препознатливи елеци со рефлективни ленти. Една од девојките јасно се гледа како ја удира врсничката по глава која веќе е соборена на земја и ја тегне за косата. 

СВР Битола официјално објави дека тепачката била пријавена во 3 часот рано изутрината во минатата сабота,  но прашањето  е дали и малолетната девојка била во ноќниот клуб пред и по полноќ и ако било така кој дозволил да влезе. 

Според полицијата - На 05.10.2024 околу 03.00 часот во СВР Битола било пријавено дека пред угостителски објект на ул.„Партизанска" во Битола, А.П.(18), А.Н.(18) и 17 - годишна девојка, сите од Битола, го нарушиле јавниот ред и мир со меѓусебна физичка пресметка. Се преземаат мерки за расчистување на настанот.