Младински културен центар – Битола, во соработка со Центарот за истражување и информирање за животната средина „Еко-свест“ и Универзитетот „Св. Климент Охридски“ – Битола (УКЛО), го организираа младинскиот настан „Младинско собрание за праведна транзиција“, кој се одржа денеска во просториите на Студентскиот информативен центар (СИЦ) при УКЛО.

Настанот собра студенти од повеќе единици на УКЛО со цел преку едукација, дискусија и интерактивна работа да ги дефинираат младинските приоритети за праведната енергетска транзиција во Пелагонискиот регион.

На настанот имаше излагања од истакнати професори на УКЛО и претставници на Општина Битола и студентското собрание, кои говореа за одржливиот развој, потребата од праведна транзиција, улогата на локалната самоуправа, зелените работни места на иднината, како и можностите за младински стартап иницијативи.

Во склоп на настанот, учесниците работеа во групи според области на интерес, со цел формулирање на заклучоци и препораки кои ќе се вклучат во идниот план за праведна транзиција.

Заклучоците од Младинското собрание се следните:

• Битолскиот регион има многу вредности како културно и приородно наследство, настани и можности за економски развој.
• Добрата прекугранична соработка нуди многу можности за економски развој кои не се искористени.
• Во Битоласкиот регион има многу неискористен ИКТ потенцијал.
• Лошата инфраструктра (патишта и железница) претставува голема пречка за развојот на регионот.
• Младите од младинското собрание ќе ги презентираат идеите на кои работеа на следниот состанок на Локалните економско социјални совети од Пелагонискиот регион и пред Министерството за енергетика.
• Заеднички ќе се изработат предлози за промена на наставната програма на УКЛО во насока на воведување на предмети за иновативни технологии во наставата (пумпно акумулациска хидроелектрана (врз рудници), термални системи за складирање енергија, биогасни електрани).
• Ќе се обезбеди континуитет за организирање на младинското собрание на секои шест месеци.

Овие предлози и препораки ќе бидат основа за изработка на нацрт-концепт за територијален план за праведна транзиција, кој ќе содржи и конкретни решенија за енергетскиот сектор, стратегии за поддршка на младите, како и препораки за политики на локално и национално ниво.

Целта на оваа иницијатива е подигнување на свеста и ангажманот на младите во процесот на енергетска транзиција, вклучувајќи ги активно во креирањето на политики и решенија кои се од интерес за локалната заедница.

Настанот претставува уште еден пример за успешна соработка помеѓу граѓанскиот сектор, академската заедница и младите, во насока на изградба на поодржлива и поправедна иднина за регионот. Настанот претставува значаен чекор во насока на активно младинско учество во процесите на донесување одлуки и поставување темели за одржлив развој и социјално праведна транзиција на Пелагонискиот регион.