Во преполниот простор на Europe House Битола, денес бројната битолска публика имаше можност да биде дел од една посебна литературна средба – мултимедијален дијалог со проф. д-р Владимир Мартиновски, истакнат македонски теоретичар, критичар, поет, писател и истражувач на современата книжевност и култура.

Неговиот извонреден настап ја претстави книжевноста како дел од еден широк културен колаж, во кој таа се преплетува со ликовната уметност, музиката, и уметноста воопшто.

Средбата не беше ни малку „обична“ – исклучителниот гостин ја претвори во интерактивен простор каде што книжевноста се сретна со визуелната уметност и музиката. Шансоната во изведба на Бранко Николовски на самиот почеток, придружната видео-проекција, изложените уметнички дела на Мартиновски како ликовен автор – сето тоа придонесе за едно вистинско патување низ време и простор, исполнето со силна синергија меѓу зборот и сликата, меѓу зборот и музиката.

Владимир Мартиновски нè потсети дека книжевноста не постои само на страниците – таа е „жив процес“ кој се адаптира, се претопува и продолжува да нè инспирира во нови форми.

Настанот е дел од Франкофонската пролет, во организација на Француското конзуларно претставништво и Француската алијанса, во партнерство и соработка со Europe House Битола.