Општина Новаци донираше опрема за кабинетот за практична настава за профилот физиотерапевтски техничар во средното медицинско училиште „Д-Р Јован Калузи“ во Битола. 

 

-Упатуваме искрена благодарност до градоначалникот на Општина Новаци, г. Стевче Стевановски, за донацијата со која беше опремен кабинетот за практична настава за профилот физиотерапевтски техничар.

Практичната настава е клучен сегмент од стручното образование – токму преку неа учениците стекнуваат вештини и сигурност за идната професија. Новата, современа опрема значително ги подобрува условите во кои тие учат и вежбаат, создавајќи реална, професионална средина што одговара на стандардите на здравствената пракса.

Ваквата поддршка претставува вложување во квалитетна едукација и мотивирање на млади луѓе кои се подготвуваат да ја вршат една од најхуманите професии – грижата за здравјето на луѓето. Благодарни сме што заедно ја градиме иднината на нашите ученици, објавија од Мединското училиште во Битола .