Советот за женско претприемништво е советодавно и координативно тело формирано од Општина Битола со цел поттикнување, развивање и подршка на женското претприемништво, економско зајакнување на жените и унапредување на локалните политики поврзани со претприемачкиот развој.

Денеска се одржа конститутивната седница на овој втор Совет на која беа избани новите раководни тела. За претседавач беше избрана Моника Марковска- д-р по менаџмент, за заменик претседавач Павлина Василевска- дипломиран економист и за секретар Анита Крстевска- дипломиран економист.

На седницата присуствуваше и градоначалникот на Битола Тони Коњановски, претседателот на Советот Бојан Бојкоски и претседателката на комисијата за еднакви можности Марина Крстиќ советничка и заменик градоначалничка.

Пред присутните 21 член на овој Совет се обрати градоначалникот на Битола Тони Коњановски.

„Да се заблагодарам најпрво на досегашниот состав за сите активности кои заедно ги спроведовте и навистина сте достоен репрезент и препознатлив не само во градот, тоа е веќе надминато и мислам дека даваме добар поттик за другите градови. Со вашите активности, сите ваши собири, она што може да се види и да се научи сте добар поттик помладите од вас да започнат свој бизнис, да се охрабрат, да останат во овој град, што за сите нас е секако најголемиот мотив“ рече Коњановски.

На седницата се најде и разгледувањето на Деловникот за работа, потоа разгледување и усвојување на извештај за активностите на Советот за женско претприемништво за 2025 година, како и планирањето на идни активности во рамките на Програмата на Советот за женско претприемништво на Општина Битола за 2026 година.