![logog.png](/images/2023/01/02/logog.png)
АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Општина Битола, ја изготви документацијата, потребна за добивање на одобрение за работа на прифатилиште за бездомни и нерегистрирани кучиња и истата денес е испратена до Агенцијата за храна и ветеринарство, која треба да даде согласност за отпочнување со работа на прифатилиштето. Како дел од документацијата, изготвен е техничко – технолошки елаборат, список на опрема, приказ и организација на работата и биланс на работната сила, како и останатата пропратна документација, потребна за извршување на оваа дејност.
Прифатилиштето кое го изгради Општината, располага со 33 бокса со максимален капацитет од 3 кучиња по бокс според законските барања, што претставува оптимален капацитет за ставање под контрола на овој проблем. Во рамките на прифатилиштето изграден е долг парк, кој е неопходен за хуман третман на животните и за спроведување на сите законски постапки при времениот престој на кучињата во прифатилиштето. Вредноста на реализацијата на оваа фаза од проектот „Изградба на настрешница во функција на објект за ветеринарна заштита“, изнесуваше 4.132.399 денари. Акцискиот план на општината за ставање под контрола на проблемот со уличната популација на хуман начин, според анализите изнесени во елаборатот, во прв план предвидува масована стерилизација на кучињата во рамките на шест до осум месеци на минимум 75% од уличната популација на кучињата, по што ќе продолжи активноста за одржување на 75% стерилизирана популација со цел континуирано намалување на уличната популација по природен пат.
Проблемот со уличните кучиња не е настанат во краток период и токму затоа, локалната самоуправа пристапи кон подготовка за отпочнување со работа на надворешниот дел од прифатилиштето, кое целосно ќе одговори на констатираната состојба и моменталните потреби, а ќе овозможи долгорошно решение, со рационално искористување на средствата од општинскиот буџет.
Прифатилиштето ќе може да започне со работа, веднаш по добивањето на одобрението од Агенцијата за храна и ветеринарство.
По соодветно имплементираните законски процедури, Битола е на чекор до добивањето дозвола за работа на прифатилиштето за бездомни животни, која ќе овозможи отпочнување со работа на прифатилиштето во наредните месеци.
ОПШТИНАТА ПРОДОЛЖУВА СО ГРАДЕЖНИТЕ РАБОТИ НА ПРИФАТИЛИШТЕТО, ВЛАДАТА НЕ ПЛАНИРА ФИНАНСИСКА ПОДДРШКА ЗА БИТОЛА
По склучувањето на договорот со „МЗТ Инженеринг“ и воведувањето во работа, интензивно продолжуваат градежните работи на терен за побрзо завршување на првата фаза од проектот за адаптација на прифатилиште за кучиња. Градоначалникот на општина Битола, Тони Коњановски, при денешниот увид на терен, информираше дека изведбата е согласно предвидените рокови, но од страна на Владата, иако беше ветувана поддршка за целосна изградба на прифатилишта низ државата, општина Битола и за овој проект е одбиена од централната власт.
„Како локална самоуправа која навистина се грижи за безбедноста на своите граѓани, продолжуваме со работа на терен, потполно заборавени, а овојпат и на наше барање отфрлени од централната власт.
Неодамна, слушајќи ги насоките на премиерот Ковачевски, поднесовме комплетна проектна документација за поддршка во реализацијата на целиот проект за изградба на прифатилиште во вредност од 46.586.092 денари, со цел заедничко и брзо делување во решавањето на овој горлив проблем за Битола. На ова, добивме одговор дека, Владата не планира средства за општина Битола, за оваа намена.
Ваквата постапка, ги негира ветувањата на премиерот дека, нивната тенденција е решавање на проблемот со бездомните животни на национално ниво, дека планираат комуникација со Брисел за обезбедување финансии за решавање на оваа проблематика, како и дека сите региони имаат еднаква важност за централната власт.
За жал, Пелагонискиот регион и посебно Битола се целосно неважни за власта, а тоа го потврдува и ова мислење од Министерството за финансии доставено до општината, во кое на нашето барање за финансиска помош од Владата во делот на реализација на прифатилиштето и измени во законската регулатива, Министерството не известува дека во буџетот немаат планирани средства за оваа намена и ни укажуваат дека општината е потребно да ги планира потребните средства за оваа намена во рамките на Буџетот на општина Битола. Додаваат дека, во делот на измена на законската регулатива потребно е да се земат предвид мислењата на надлежните институции, иако ова не е случај за други проекти кои сакаат да ги реализираат, на чуден и неразбирлив начин.
Општина Битола, продолжува со работа и на оваа проблематика, како што паралелно работи на изградба и реконструкција на улици, социјална заштита, културна промоција, спортска поддршка и реализација на сите проекти кои значат подобри услови за нашите граѓани“, изјави градоначалникот на општина Битола, Тони Коњановски.
Изградбата на настрешници во функција на објект за ветеринарна заштита ќе биде завршена во предвидениот рок со општински средства во износ од 4.132.399 денари, за да може веднаш по завршувањето на законските процедури, да се започне со соодветен третман на бездомните животни и нивно отстранување од битолските улици