По 15 години битолските пожарникари добија нова заштитна облека и дишни апарати со компримиран воздух. Оние кои до сега ги користеа, беа набавени во 2004 година како донација и не беа нови.

Битолската пожарна ќе се поднови со 16 дишни апарати, 42 специјални комбинезони за гаснење пожар на отворен простор, комплет со пожарникарски ракавици и чизми. Опремата се набавува во рамки на проектот Јакнење на капацитетите на територијалните противпожарни единици во Пелагонискиот регион (Битола, Прилеп, Ресен).

Центарот за развој на Пелагониски плански регион и Министерството за локална самоуправа на РМ, го потпишаа договорот за реализација на овој проект. Проектот е аплициран до Бирото за рамномерен регионален развој, а вкупната вредност е 4.163.550 денари.

Во Македонија недостигаат 750 пожарникари, а дел од постоечките пожарникари и други кои очекуваат да бидат ангажирани имаат невалидни дипломи, велат од Центарот за обука на професионални пожарникари „Пегаз Еду“ од Битола.