Започна пролетната акција на Општина Битола и јавното претпријатие „Комуналец“ за почиста и позелена Битола со засадување на 2000 садници претежно во урбаните делови на општината. 

„Ова е првиот дел од акцијата 'Сите за почиста и позелена Битола' во која учествуваат сите јавни претпријатија, а упативме и повик до стопанските субјекти  во градот  да се вклучат во акцијата. Неколку месеци ќе се работи на засадување на садниците на зелен и црвен јавор.Активноста ќе  се одвива во неколку фази, а продолжува и во мај и  е  дел од активностите на Општината за градот да  го направиме почист и  поубаво место за живеење“, рече Коњановски. 

Директорот на ЈП „Комуналец“ Горан Степановски рече дека денес  се започна со засадување на садници на потегот од Брусничка населба до горното Веро, а се очекува да бидат засадени 150 садници. 

„Акцијата продолжува на повеќе локации низ општина Битола. Се предвидува да се озеленат нови површини, меѓутоа и обновување на веќе постоечките садници. Дел од локациите каде ќе се сади се улиците Осми Септември, осносно влезот на Битола, Зоолошката градина, новата населба Касарна, делови кај основни училишта и останати локации каде службите ќе предвидат дека е можно засадување во зависност од типот на садниците кои  се  потребни и можат да опстојат на тој простор“, рече Степановски. 

Запрашан што ќе биде приоритет во неговиот директорски  мандат одговори дека тоа ќе биде чистењето и разеленувањето на градот. 

„Како јавно претпријатие ќе вложиме максимални напори да го зголемиме квалитетот на услугите што ги нудиме за чистотата и зголемувањето на нови зелени површини“, рече Степановски.