Сметките на училиштата се блокирани од извршни решенија по основ на разни долгови, а еден извршител наплатил 100 000 евра за вкупните извршувања во едно од училиштата, други извршители за други извршувања 200 000 евра.

Од Општината на денешниот брифинг со новинарите рекоа дека интензивно работат за изнаоѓање решение од ситуацијата. Парите не се проблем бидејќи и блок дотациите за годинава се зголемени, но се соочиле со законски ограничувања.

„Училиштата се со блокирани сметки, а имаат извршни решенија и тие не може да плаќаат, а не може ни Општината по пат на цесии да ги плаќа нивните доверители зашто тоа е незакионски, за да не се доведи некој доверител во повластена позиција во однос на друг. И тоа е кривично дело. Средното училиште ‘Таки Даскало’ успеа да ја плати струјата зашто настана вакум простор, осносно беше одблокирано на неколку часа. Се преземаат начини за решавање на проблемот во уште едно улилиште, доколу тоа успее ќе се обратиме до ЕВН да се преземи постапката и за другите училишта“, рекоа од Општина Битола.

За состојбата е известена Владата и министерствата, па формирана е и работна група предводена од премиерот за изнаоѓање на решение.

Најдрастични примери за долгови се Медицинско училиште со 35 милиони денари, „Крсте Петков Мисирков“ со 39 милиони денари, „Елпида Караманди“ 21 милион, „Гоце Делчев“ 19 милиони, „Климент Охридски“ 20 милиони денари и други. Вкупниот долг на училиштата е 4,6 милиони евра, а како што велат од Општина тековните трошоци не биле сервисирани редовно со години наназад за време на претходната власт, па долговите се напластиле.