АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Тимот StayBe од Битола е победник на „СРЕДНОШКОЛЕЦ МИЛИОНЕР“ со награда од 1 МИЛИОН ДЕНАРИ. Младите иноватори се натпреваруваат со свои бизнис-идеи односно Систем 4 (StayBe – Битола) подразбира AI-сервис за луксузни ресторани и хотели кој автоматски ги анализира нивните проблеми и нуди три видови дигитални решенија: AI веб-асистент, AI телефонски агент и брза изработка на веб-страни.
Тимот е составен од тројца ученици од трите битолски средни училишта:
- Иван Секуловски — тим лидер од СОУ „Јосип Броз Тито“ (Горна гимназија)
- Јован Талевски — СОУ „Ѓорѓи Наумов“ (Техничко училиште)
- Марио Рабаџиевски — СОУ „Таки Даскалот“ (Долна гимназија)
Организаторите објавија - Големо задоволство ни е да соопштиме на првото издание на „Средношколец Милионер“ – најголемиот натпревар за средношколци во Македонија. Од почетната визија да создадеме платформа што ќе ги открие и поддржи најамбициозните млади претприемачи, до денешното финале, помина долга и интензивна подготовка. Но најважно е што резултатот ја оправдува секоја инвестиција во оваа мисија.
Победникот ја освојува главната награда од 1.000.000 денари, донација од основачот на Brainster групацијата, Петар Ниновски, кој сака да им овозможи на младите претприемачи можност што и нему му била дадена на почетокот.
Покрај тоа, победниците добија и понуда од инвеститорите за дополнителна инвестиција од 6000 евра, како и вредносни ваучери за Бреинстер НЕКСТ и НУ академијата за талентирани средношколци.
„Честитки на сите, бевте фантатични. Не беше лесно да се одлучи кој ќе биде победник, но тоа што го видовме е дека вие сте спремни и иднината останува на вас, буквално. Ние се потпираме на вас и продолжете да го правите ова што го правевте досега. Честитки“, изјави основачот на Бреинстер групацијата Петар Ниновски обраќајќи се до сите финалисти на најголемиот средношколски натпревар во Македонија досега, „Средношколец Милионер“.
Stay BE со „Систем 4“ имаат идеја да помагаат на други бизниси од областа на туризмот и угостителството, со фокус на луксузните хотели со ресторани во САД и државите од Европската Унија.
„Користиме автоматизиран систем со вештачка интелигенција кој наоѓа илјадници ресторани во определена локација, ги аланизира проблемите со кои тој бизнис се соочува, им испраќа порака преку е-пошта за тоа каков проблем имаат, како можеме да им помогнеме со еден од трите системи кои ги нудиме(во некои случаеви покрај пораката испраќаме и бесплатна демо верзија од решението на потенцијалниот клиент за да покажеме професионалност, посветеност и да изградиме доверба).
Системите се: AI асистент за на веб страната (AI Chat Assistant), AI телефонски агент (AI Phone Callers), или надградување/обновување на веб страната за неколку часа користејќи специјализирани алатки со вештачка интелигенција. Потоа, кога добиеме повратна порака, ние веднаш започнуваме да ги градиме тие системи“, пишуваат Stay BE за својата победничка идеја.
Јован Талевски, Иван Секуловски и Марио Рабаџиевски се средношколци од три битолски средни училишта и велат дека биле сигурни во победата.
„Чувството е победничко. Очекувавме победа уште од почетокот. Немаше идеја која беше приближно до нашиот концепт. Нашата идеја мисли за иднината и помага на луѓето особено на бизнисите. Кога слушнавме дека ќе има ваков натпревар во Македонија, веднаш знаевме дека ќе формираме тим, па требаше само да се собереме, да ја структуираме идејата и да победиме. Милионот денари нема да ги трошиме по одмори и забава, туку ќе ги вложиме во идејата, ќе работиме уште помотивирано. Нема веќе одмор за нас“, низ смеа и задоволство зборуваат Иван, Јован и Марио.
Второпласирани со само 5 поени помалку од победниците беа момците од Академија Разлика и нивниот одличен концепт „ПаметПакет“ кои исто така добија понуда од инвеститорите за инвестиција во нивната идеја. Третото место им припадна на ЈКЦ Милионерс со идејата DWear. Сите учесници од тимовите на ТОП 10 финалистите добија вредносни ваучери за образовниот екосистем на Бреинстер - факултетот НЕКСТ и НУ Академијата.
Бреинстер останува целосно посветен на градење на образовен и претприемачки екосистем кој создава кадри подготвени за иднината. Преку практична настава, менторства, реални проекти и поддршка од компаниите, продолжуваме да ги развиваме младите кои сакаат да создаваат, а не само да следат.
Честитки за сите учесници, до следната ваква убава, креативна и продуктивна прилика.
