АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Дел од поранешните советници на СДСМ му дадоа поддршка на кандидатот за градоначалник Методија Куновски и испија со него кафе. Општинската организација објави фотографии од средба на Куновски со поранешни советници во битолскиот Совет, меѓу кое се Емилија Костурска, Славе Најдовски, Влатко Шеровски, Стевче Илиевски, Менде Диневски, Жанета Наумовска, Елена Кромидаровска. Дел од присутните на средбата се и сега кандидати за советници како Петар Николовски, Јадранка Павловска, Александар Дракуловски.
-Средба и кафе дружба на кандидатот за градоначалник Методија Куновски со поранешни советници во Советот на Општина Битола од СДСМ Битола.
Во пријатен разговор и споделени многу искуства, Куновски несомнено ја има поддршката од целото претходно раководство. Пораката е јасна, ако силата е во единството, се наоѓаме на вистинскиот пат до победа во Битола!, објавија од СДСМ Битола.
Според објавените фотографии недостасуваат истакнати советници и од последниот состав на Советот и од тие претходно кога на чело на општината беше Наташа Петровска. Можеби од оправдани причини, но на фотографиите не се Методија Илиевски и Борче Корлевски советници во неколку мандати, не е Мирјана Захариевска - Ралевска, носителот од минатите избори Александар Димовски, Татјана Крнчева (актуелен кандидат), Виолета Дракалска и други.
Инаку, утре е централниот предизборен митинг на СДСМ во Битола во 20 часот во големата сала во Центарот за култура каде се очекува сплотување на сите фракции во општинската организација со цел позитивни резултати за Куновски и советничката листа на гласањето в недела. Според најавите на митигот ќе се обрати лидерот на партијата Венко Филипче, кандидатот за градоначалник Методија Куновски и носителот на советничката листа Петар Николовски.
А.Б
