-Престојувајќи на повеќе планини во Македонија, на Балканот и на Алпите концептирав одреден број на фотографии за изложба така да досега имам реализирано педесеттина изложби на тема убавините на планините , посебно на Пелистер  во која што сме ние битолчани влубени од срце. На оваа изложба денес може да се видат најкарактеристичните убавини што и досега сум ги претставил во повеќе градови во државата. И натаму ќе продолжам со подготвување на фото изложби, бидејќи имам богат фонд од десеттина илјади, а можеби и повеќе фотографии, рече авторот Ставрев.

Во рамките на изложбата претствени се и одредени мисли како „Шетајте по шумските патеки за да не шетате по градските аптеки“, „Без разлика со какви мисли ќе тргнеш радосен ќе се  вратиш“, „Вљубеноста во Пелистер е трајна“  и  сл.

Но, Ставрев вели дека не е лесно да се направи една убава и успешна фотографија.

-Секогаш има потешкотии и непредвидени работи, затоа треба да се внимава, имам една мисла дека „планината не е трка, таа е интима за уживање “. Најмногу проблеми сум имал  со водопадите затоа што тие се во најтешките места и треба тука да се расчисти теренот да се почека два-три часа да се слезе долу, а вода од сите страни блика. Инаку од животни не сум се плашел сум ги снимал, иако тие бегаат од човекот посебно  од планинарите, вели Ставрев.

Изложбата е на само два дена пред големата прослава на Националниот парк Пелистер- 70 години од  прогласувањето за прв Национален парк во Југославија.

-Националниот парк Пелистер е тринаесеттиот прогласен парк во Европа после Втората светска војна во 1948 година. Горди сме што нашиот град и нашата околина го има Пелистер и секогаш им било задоволство на фотографите и уметниците  да им биде инспирација. Националниот парк Пелистер со скромните приходи што ги има и овој пат имаме чест во оваа педесетта изложба на Ставрев  со фотографии да го прославиме овој јубилеј. Ставрев од неговите десеттина илјади фотографии за Пелистер направи  избор, кој што е тука пред нас, рече Пеце Цветановски од Националниот парк Пелистер –Битола.