Во недела во текот на ноќта и во понеделник ќе има локални врнежи од дожд и снег на пониските, а снег на повисоките места и на планините.

Широк Сокак е исчистен од снегот и прооден, а битолчани и покрај студеното време повторно на кафе или на прошетка на чист воздух. Врнежите снег преку ден ги паднаа и концентрациите на ПМ 10 честичките во воздухот. Двете мерни станици во центарот и периферијата на градот денес измерија присуство на ситни суспендирани честики под дозволениот максимум. Тешко дека ваквиот тренд ќе остане и вечерва кога ќе се разгорат ќумбињата.

Снежните врнежи предизвикаа кршење на гранки од улични дрвја, а навалија и бандери низ повеќе улици во Битола.

Иако календарски зимата се уште не е почната, снегот што непрекинато паѓа во Битола од утрово, формира и снежна покривка, а сообраќајот се одвива по кашести коловози. Од ЈП „Нискоградба“  за апла.мк велат дека нивната механизација веќе е на терен, а на критичните места се фрла сол, додека по селата се чистат локалните патишта, за што на нивната ФБ страница објавија и кусо видео.  Од таму најавија дека за кратко време попладнево на терен ќе биде целата механизација со која располага ЈП „Нискоградба“

Патот од Ресен за Битола не е исчистен од снегот, покажуваат слики што патници ги постануваат на социјалните мрежи.

Снежните наноси на коловозот се нагмечени од возилата што минуваат на оваа релација.

Од Австомото Сојузот на Македонија јавуваат дека сообраќајот на државните патишта се одвива отежнато и по влажни коловози поради врнежи од дожд и снег. На планинските премини Стража, Ѓавато, Буково и Пресека има остатоци од снег на коловозот, но нема забрана за движење на возилата. Препорачуваат намалена брзина на движење и исклучително внимателно управување со возилата.

Од 15 ноември стапи на сила законската обврска за задолжително поседување на зимска опрема во возилата, без оглед на временската состојба. Оваа обврска ќе трае до 15 март 2019 година.