„Оваа школа е за сите деца кои сакаат да спортуваат, да напредуваат и да се дружат преку спортските активности. И педагошки ќе се делува врз децата. Да се трганат од таблети, телефони, компјутери и да рекреираат. Не мора да значи дека тој што ќе биде во оваа школа ќе стане ракометар, потоа може да продолжи и со други спортови во зависност од своите можности. Но, сакаме на децата да им дадеме еден правец во животот преку спортот“, рече за Апла.мк тренерот Кирил Атанасовски.

Ракометната школа „Кирил Лазаров 7“ за првпат се отвора во Битола и Новаци. Со тоа овие две пелагониски општини се приклучуваат кон дванаесетина македонски градови каде школата ја има раширено својата мрежа, а тоа се Скопје, Свети Николе, Куманово и други. Очекувањата на тренерите Атанасовски и Марковски се дека отварањето на школата на капитенот во Битола ќе биде од големо значење за откривање на таленти, со оглед на огромното ракометно искуство кое го има Лазаров, тие велат дека проектот наидува во право време и во Битола, потсетувајќи дека Пелистер е клубот од каде Кире почна да ја освојува ракометна Европа. За Битола оваа школа е допста важна зашто од секогаш бил град на ракометот во Македонија. 

Мисијата на ракометната школа „Кирил Лазаров 7“ е во тренинзите да ги вклчи и децата од руралните средини, кои ретко се вклучени во други спортови освен фудбалот.

„Во повеќето рурални средини децата не беа опфатени со ракометот. Ете во Новаци освен фудбал, дури спортови немало. Тука е и околното село Логоварди, па и од таму запишуваме деца, тие со тренинг ќе започнат од октомври“, велат од школата „Кирил Лазаров 7“.

Сите заинтересирани родители и ученици повеќе информации за школата и за уписите можат да најдат на нивната Интернет страница www.kl7.mk