Воспитувачот Радмила Димчевска  од денеска е на чело на средношколскиот дом ДУД „Мирка Гинова“ во Битола. Димчевска е назначена за вршител на должност и таа е избрана од редот на вработените. Димчевска е искусен и докажан воспитувач во Средношколскиот дом од 2010 година, со бројни награди на натпревари на ученички домови и со успеси во воспитно-образовната работа, односно грижата и едукацијата на децата - штитеници. Таа е дипломиран економист и одличен познавач на организацијата и потребите за економско функционирање на Средношколскиот дом во Битола со голема поддршка од вработените, велат од Домот. 

Димчевска е назначена за ве-де директорот откако Елена Спасеновска си даде оставка после извесен период боледување, пред да го заврши мандатот. 

Спасеновска од февруари годинава е под лупа на истражните органи, ОЈО Битола отвори истрага за нејзиното раководење во Домот, после новинарски истражувања на медиумите „АПЛА“ и „Независен“,  а во јули годинава доби кривични пријави по неколку основи за „злоупотреба на службена положба и овластување“, „несовесно работење во службата“, „фалсификување исправа“ и „употреба на исправа со невистинита содржина“, сите од Кривичниот законик, извести МВР.

Се очекува одлуката на ОЈО Битола по истрагата во Средношколскиот дом  за работењето на  Спасеновска.