Генералниот секретар на СДСМ Александар Саша Димитријевиќ по се изгледа се направил пишман што  битолските социјалдемократи што беа на средба со него ги нарече ,,најактивните членови", па откако останати сопартијци од Битола го  "подбраа" со негативни коментари се откажа од пофалбите и ги избриша ,,најактивните". Димитријевиќ синоќа напиша едно, денес смени, се предомисли.  Генералниот секретар на СДСМ Димитријевиќ синоќа дојде на средба во Битола на која присуствуваа дел од партиските функционери и членови од Битола на чело со Драган Крајовски нов член на ИО, со цел да се изнајде решение да се консолидира општинската организација по оставката на доскорешниот претседател Методија Куновски. Иако беше најавено дека ќе избираат вршител на должност, како што првично за АПЛА кажа  Крајовски, најновото од синоќа е дека ОО на СДСМ Битола ќе ја води координативно тело се до изборот на нов претседател. Но, младиот Димитријевиќ најверојатно сакајќи да ги пофали оние битолчани што го почестија со присуството на средбата и седеа со него на маса, веднаш објави Фејсбук статус со неколку фотографии и ги окарактеризира како ,,најактивните членови" Арно ама, без задршка дел од членството меѓу кои и поранешни советнички во Советот на општина Битола и други партиски функционери, јавно го "подбраа" ген-секот на СДСМ во коментари.  Така, поранешната советничка Мирјана Захариевска-Ралевска го искритикува  Димитријевиќ дека текстот што го објавил е несоодветен и прави штета. Со отворени критики кон генералниот секретар пишуваат и Самедин Канановски и Благојче Спасевски кои се активни членови, поранешни и актуелни претседатели  на месните заедници на СДСМ Битола, над две децении, а без воздржувања критикува и екс советничката Елена Кромидаровска.  По јавните негативни критики и сугестии  дека генералниот секретар на СДСМ  недоволно ги познава состојбите, односно членството во Битола, Димитријевиќ денеска ја менува првата реченица од Фејсбук статусот ,,Од Битола заедно со најактивните членови се обраќам до вас" во  нова реченица која гласи ,,Од Битола се обраќам до вас". На Фејсбук лесно може да видат промените што ги направил Димитријевиќ на обраќањето по средбата додека беше меѓу битолчани. Оттука членови на СДСМ кои ја забележаа разликата велат дека генералниот секретар на СДСМ Димитријевиќ, по се изгледа  попуштиил на критиките од битолските сопартијци и решил да се коригира во "пофалбите" . Инаку тешка е состојбата во СДСМ Битола, во позиција на опозиција ретко кој се нафаќа да ја води партијата. За да се биде локален лидер требаат пари, ресурси, а во опозиција се "нема"  пари за кафе, а не пак да се води партија, да се плаќаат сметките за струја за партиската зграда. Сега  само предвремени парламентарни избори може да ги активираа битолските социјалдемократи за да почнат со "сопки"  пред кроењето на пратеничките листи.  Текст Анета Блажевска