Акцијата „Дај свој придонес-засади дрво“ што минатата година ја иницираше компанијата „Интерворкс“ за засадување на 10 илјади садници на повеќе локации низ градот, продолжи и денеска со засадување дрвца во градскиот парк и на други јавни површини. Годинава на “Интеворкс“ и се прклучија уште 8 битолски компании „Бимилк“, „Кромберг и Шуберт“, „Хемометал“, „Синпекс“, „Киро Дандаро“,„ Кус Кус“ и „Цилиндо“, а акцијата и во наредниот период ќе се одвива со поддршка на Општина Битола и ЈП „Комуналец“, кој во иднина ќе ги одржува садниците.

- Во оваа фаза ќе бидат засадени 2800 садници, од кои 1030 на јавни површини, во дворовите на основните училишта, градинките, Зоолошката градина, градскиот парк и во Клиничката болница.  Останатите садници ќе бидат доделени на физички и правни лица кои  ќе  ги засадат дрвцата во своите дворови. Со ова сакаме да дадеме пример како компании дека можеме да дадеме свој придонес за зачувавање на животната средина и зголемување на квалитетот на амбиенталниот воздух. Благодрани сме за вклучувањето на другите донатори, а акцијата ќе продолжи и на есен, рече Јасмина Антиќ Атанасовски, од „Интерворкс“

Од „Синпекс“ ги повикаа и останатите компании да се приклучат на вакви иницијативи за зачувување на животната средина.

-„Синпекс“ безрезервно се вклучи во оваа акција, а во своето 30 годишно постоење била и иницијатор на вакви слични акции. Би сакале да апелираме кон другите физички и правни субјекти да ги поддржуваат ваквите иницијативи. Сите се вклучивме со една цел да покажеме колку е важно зачувувањето и одржувањето на животната средина. Тој пример го следиме постојано, а како компанија која тругува со различни производи,  се обидуваме да бидеме пријателски настроени кон животната средина, рече Иванчо Стаматовски, „Синпекс“

Од ЈП „Комуналец“ велат дека ваквите иницијативи се од огромно значење и во насока на подигање на еколошката свест кај граѓаните

- Одлична иницијатива и доказ за она што го зборуваме дека Еко центарот кој што го ставивме во функција е точно за една вакава намена, да се координира и да се дава логистичка поддршка за секоја иницијатива  и на тој начин да придонесме за заштита на животната средина, а целта е подигање на свеста кај граѓаните за однесувањето кон животната средина, рече Панде Богоевски, диркетор на ЈП „Комуналец“-Битола.

Советниците во општинскиот Совет од ВМРО-ДПМЕН, исто така ја поддржаа иницијативата, но велат дека Општината треба да даде поголем придонес за зачувување на животната средина.

-Ја поздравуваме ваквата иницијатива на „Интеворкс“ и нивните партнери и ги охрабруваме сите стопанственици во Општина Битола и во иднина да го следат ваквиот пример и да вложуваат во здрава животна средина. Во изминатиот  период,  не се преземени ниту краткорочни ниту долгорочни мерки за аерозагадувато. Потрошени се нула денари за проектот гасификација, а исто така потрошени се нула денари за испитување на почвата и воздухот во Општина Битола. Се ветуваше и катастар на загадувачи, но се уште го немаме. Го охрабруваме ваквиот потег, но тука треба да се вклучи и Општина Битола со свои средства и свои  капацитети, рече Елена Трајчевска, советник од ВМРО-ДПМНЕ.

Во засадувањето во градскиот парк, со помош на вработените во ЈП „Комуналец“   учествуваа децата од градинките , ученици од основните и средните училишта во градот,  како  и дел од лицата со посебни потреби и членовите на здружението „Порака“.

Акцијата продолжува утре во Клиничката болница во Битола, пред  одделението за Онкологија, каде ќе бидат засадени 130 садници.