Според резултатите од аналитичките центри на партиите, дури петмина пратеници Битола ќе има во следниот парламентарен состав да се залагаат за интересите на градот. Од СДСМ идни пратеници ќе бидат универизитетскиот професор по англиски јазик, доцент и продекан за настава на Педагошкиот факултет, Бисера Костадиновска- Стојчевска, која беше трета на кандидатската листа на „Можеме“ и досегашниот директор на ЈП „Водовод“, инаку по професија машински инженер, Горан Козаров кој на листата беше број 9.

Според изјавата на лидерот на СДСМ, Зоран Заев, на ниво на држава имаат три мандати повеќе од ВМРО-ДПМНЕ. 

Од ВМРО-ДПМНЕ, според нивниот аналитички центар во петтата изборна единица освоени се осум пратенички мандати. Тоа значи дека оваа партија во идниот парламентарен состав ќе партиципира со тројца битолски пратеници. Тоа се оперскиот пејач Игор Дурловски, кој ја предводеше кандидатската листа, универзитетската професорка од Техничкиот факултет во Битолаи поранешен претседател на општинскиот Совет, Силвана Ангелевска, која на листата беше трета  и специјалистот по интерна медицина Олга Лозановска, досегашен советник во општинскиот Совет на Битола, шеста на листата.Според прес конференцијата на лидерот на ВМРО-ДПМНЕ , Христијан Мицкоски, разликата во пратенички мандати на ниво на држава е два.