Битолскиот Сосвет се повлече од идејата за формирање на Комисија за туризам составена од членови на Советот и надворешни лица, идеја која  според опозицијата се тераше ,,незаконски “од страна на претседателката на Советот Габриела Илиевска и за која објави јавен конкурс. Илиевска без одлука на Совет, спроведе и објави јавен конкурс, во кој предвидуваше состав на комисијата од 9 члена, од кои пет членови на Советот, еден претставник на градоначалникот и три надворешни членови, потег кој од опозицијата беше оквалификуван како незаконски и нестатутарен.

Валентин Груевски, советник од ЛДП, на вчерашната седница обвини дека претседателката на своја рака, без да праша никој си распишала конкурс, никого не консултирала и истиот е незаконски и се кршат и статутот и деловникот на Битолскиот совет.

- Целокупниот процес е незаконски, нестатутарен, надвор од деловникот за работа на Советот на Општина Битола. Објавувањето на повик од страна на претседателот на Совет за оваа комисија е незаконска бидејќи никој не му дал право за тоа. Спротивно  е на член 48 од Законот за локална самоуправа.  Во ниедна комисија на Советот без разлика дали е постојана или повремена не можат да учествуваат надворешни членови, рече Груевски, додавајќи дека Советот треба да формира комисија но во согласност со статутот на Советот на Општина Битола.

-Ќе се формира комисија од 5 члена онака како што беше во претходниот Совет, од советници, а конкурсот ќе се почитува бидејќи се пријавија многу заинтересирани луѓе на истиот- изјави Габриела Илиевска.

По ова Груевски возврати „Искажувам задоволство од тоа што прифативте дека го згрешивте јавниот повик, и прифаќате дека Комисијата ќе биде од 5 члена онака како што јас ви предлагав, рече Груевски.

На крајот Советот избра петчлена комисија која е составена од советници.