Заврши капиталниот ремонт на Блок 2 на РЕК Битола. Постројката е синхронизирана со електроенергетскиот систем на РСМ и испорачува електрична енергија согласно потребите на потрошувачите.

Ремонтните активности на Блок 2 на РЕК Битола започнаа на 7 септември и за време на зафатот беше направен капитален ремонт на турбината, за првпат после осум години. Паралелно се одвиваше и првата фаза од реконструкцијата на разладната кула на постројката. Со тоа, зголемена е доверливоста и ефикасноста на Блокот.

            По вклучувањето на Блок 2, од работа ќе биде исклучен Блок 1 на РЕК Битола и производството од комбинатот ќе продолжи со Блок 2 и Блок 3, согласно планот за производство на АД ЕСМ и потребите на системот. Во моментов, електроенергетскиот систем на земјата има доволно количество на струја што ја обезбедуваат капацитетите на компанијата. Блок 1 на РЕК Битола ќе остане во состојба на “ладна резерва”, подготвен да биде вклучен во производствен процес во секој момент кога ќе има потреба електроенергетскиот систем на државата.  

            Во периодот од 01.01.2019 година до 02.12.2019 година, РЕК Битола од планираните 3.025 GWh произведе 3.252 GWh електрична енергиија, односно 108 проценти од планираното. 

Се врши ревизија на сите рударски проекти во РЕК Битола, а бројките треба да покажат која ќе биде иднината на комбинатот, и какви се можностите за транзиција кон други еколошки енергенси за производство на електрична енергија.

РЕК Битола ја охрабрува политичката партија ВМРО – ДПМНЕ будно да го следи работењето на комбинатот и во иднина. Да ја известува јавноста и за инвестициите во капитални проекти што се во тек или што се планираат во блиска иднина. Производствените и финансиските биланси на РЕК Битола и на АД ЕСМ изминатите две години доволно зборуваат за начинот на работа на комбинатот и компанијата. Тие се заслуга на СИТЕ вработени.

Во меѓувреме, РЕК Битола ќе го санира дефектот заради кој Блок 3 денес е надвор од функција. Ќе ги санира и сите евентуални следни дефекти на различни простројки кои со години наназад биле запоставени и ќе обезбеди стабилно производство на електрична енергија во Република Северна Македонија.

Блок 1 на РЕК Битола е исклучен од електроенергетскито систем во петокот, на 4 октомври, околу 23:30 часот, заради дефект на цевки во котелот на постројката. Се очекува да биде повторно ставен во функција во текот на утрешниот ден. Точно е дека Блок 1 почесто “испаѓа” за разлика од другите два блока на РЕК Битола, но вистината е дека причина за тоа е неуспешниот и сомнителен обид за модернизација на котелот на блокот од 2014 година. Обид заради кој и денес РЕК Битола е вовлечен во судски процеси и меѓународна арбитража, а на комбинатот му се закануваат милионски отштети кон странските партнери, при што трпи електроенергетскиот систем на земјата.      

Лицемерно е ВМРО – ДПМНЕ да зборува за партизација на РЕК Битола ако се знае дека за 11 години, колку што беше на власт оваа партија, во комбинатот се вработиле околу 1.400 лица, во најголем дел распределени на непродуктивни работни места. Последиците се чувствуваат и денеска.

Во ВМРО – ДПМНЕ може да бидат спокојни бидејќи тоа што не го направиле кога можеле и морале, а се однесува на ефикасноста во работењето на блоковите или , на пример, заштитата на животната средина, сега се надоместува со крупни чекори. За следната година предвидени се над 30 милиони денари за зголемување на доверливоста и ефикасноста на Блок 1, со што повторно ќе санираме наследени состојби.