Претседателката на Советот на Општина Битола, Габриела Илиевска, се сомнева дека службеници од Општина Битола, но и надворешни лица го злоупотребуваат нејзиниот службен меил, откако писмо адресирано лично до неа Општината го испрати до медиумите. Станува збор за известување кое Делегацијата на ЕУ го упати до Илиевска како одговор дека сретства од проектот „Смартфорју2“ не може да бидат искористени за реконструкција на објектот Парк. Илиевска смета дека во случајот има и нарачател, поради што ќе го пријави во обвинителството за упад во нејзината електронска пошта.

- Некој службеник или некои службеници од администрацијата на Општина Битола, неовластено ја користеле мојата емаил адреса и електронското сандаче кои ги имам како Претседател на Совет за комуникација со исто така надворешни лица за кои јас не сум дала никакво овластуванје или согласност. До денес не ни имав сознанија дека ова се случувало во општината, за кое нешто веднаш ќе отворам предмет во Јавното Обвинителство во Битола и ќе барам најригорозно да се казнат сторителите на овој упад кон мене како Претседател и човек и да спречам во иднина да не се повтори на било кој друг советник во градот. Сметам дека сторителите имале и помош од други лица кои се стручни во областа на информатиката за да го изведат овој упад, што како факт ќе го истакнам, исто така пред органите. Ерата на злоупотреба на личните податоци, загрозувањето на основните човекови права одамна заврши тука, меѓутоа најверојатно не и за некои службеници во општина Битола. Допрва пред органите ке си кажат кој тоа го наредил, кој го организирал и со која цел. Верувам во институциите на системот и верувам дека оваа криминална афера ќе ја расчистат брзо ефикасно и законито, вели Габриела Илиевска, претседател на Советот

Илиевска вели дека одговорот од Делегацијата на ЕУ го препратила до сите советници потпишани на писмото кое му го врачија на евроамбасадорт Дејвид Гир при посетата на Битола.

-Јас од одреден медим разбрав дека сум скрила некакво писмо, кое е адресирано до мене и до советниците кои се потпишаа на писмото до Европска делегација. Прашањето е за какви европски вредности зборува општина Битола, за какви европски стандарди и проекти зборува кога објавува службен меил кој е лично мој и писмо адресирано лично до мене. Ме  интересира на кој начин стигнале до писмото, се соменвам во злоупотреба, додава Илиевска.

Во писмото кое Општината го испрати до медиумите се наведува

„Активноста „Реконструкција на постоечката зграда  на објектот „ПАРК“ во Битола“ како дел од проектот SMART4YOU2 прекугранична соработка беше модифициран бидејќи, водечкиот апликант, немаше доволно средства за реконструкција на оваа зграда, воглавно поради неодамнешните покачувања на цената. Како резултат на тоа, водечкиот апликант, предложи, наместо тоа, основање на систем од велосипедски патеки во градот Битола. После проценката на оправданоста и ревизијата, Делегцијата го дозволи овој амандман, кој подлежи на одредени услови, бидејќи одговара на слични иницијативи низ Европската унија, каде туристите можат да изнајмуваат (со наплата или бесплатно) велосипед и да посетуваат локални знаменитости. Не постои можност за понатамошно финансирање кое би можело да се намени за реконструкција на постоечката зграда „ПАРК“ во Битола“

На денешната седница на Советот, градоначалникот Тони Коњановски, побара одговор од претседателката на Советот, Габриела Илиевска, за писмото  од Делегацијата на Европската унија.

-На 19 октомври при посетата на амбасадорот Дејвид Гир на Битола, новото мнозинство предаде едно писмо со ваши размислувања во однос на проектот Смартфорју2. Со оглед дека Општина Битола е водечки партнер во тој проект, а моите инфомаации се дека стигнат е одговорот на тоа писмо. Би сакал да ве замолам да го обзнаните пред јавноста и советниците, рече Коњановски и ја праша Илиевска дали ќе добие одговор.

Илиевска му рече дека според деловник и статут, советниците поставуваат прашања.  

Уште повеќе се заостри реториката меѓу претседателката на Советот на Општина Битола, Габриела Илиевска од независната советничка група „Поинаку“ и градоначалникот Тони Коњановски од ВМРО-ДПМНЕ.

Илиевска на денешната седница на Советот го обвини Коњановски за диктатура зашто до неа стигнал допис од секретарот на Општината дека доколку бара информации до општинската администрација, треба да ги достави до нив, што таа го оквалификува како обид за запирање на информациите. Градоначалникот пак, кажа дека постапуваат според законските одредби, Статутот и Деловникот на Општината во однос на обврските на службите и нема да дозволат врз администрацијата да се врши психички мобинг.

Новата конфронтација настана откако Илиевска побара од раководителите на сектори и одделенија во Општината да ѝ се достави писмено образложение по предлог точките што ги имаат доставено за 30 седница на Советот.

„До мене стигна допис од секретарот на Општината со кое ми налага како на советник и претседател на Советот доколку сакам да добијам било каква информација морам да се обратам до нив притоа не смеам да се обратам до ниедна од другите служби зашто за тоа немам надлежност. Ми беше кажано дека вакви лични услуги, да се испраќа известување до претседателката на Советот, нема веќе да ги вршат службите, а замислете имаме служба за поддршка на Советот. Градоначалник, ова е класична диктатура, која никогаш нема да ја дозволам и да кажите дали ќе го отповикате дописот“, рече Илиевска.

Од Општина Битола одговорија дека се испочитувани законските одредби во однос на обврските на општинските служби. Согласно Законот за локална самоуправа, оној за административни службеници и Статутот на Општината, градоначалникот и секретарот раководат со општинската администрација, па барањата за информации треба да бидат доставени до нив, па тие понатаму да ги проследат до соодветните сектори и одделенија. Велат во случајот се барало дополнително писмено образложение по точките кога за истите биле изготвен и доставени материјали, а доколку има потреба предлагачите од редот на општинската администрација на соодветните работни тела или на самата седница даваат стручни образложенија или мислења.

„Општинската администрација и секретарот се на располагање на Советот и граѓаните и тоа јасно сите го имате на увид, тука не треба дискусија, секојдневно сме во контакт и со советниците и со граѓаните и со претседателката на Советот и се она што треба да го добие. Меѓутоа, нема да дозволам психички мобинг врз административните службеници од било кого, вклучувајќи ја и претседателката Советот“, рече Коњановски.

Веќе неколку месеци се нарушени односите меѓу ВМРО-ДПМНЕ и „Поинаку“ откако се распадна советничкото мнозинството во битолскиот Совет.

Ж.З.