Расте бројот на заболени пациенти во Психијатриската болница во Демир Хисар. По 19 пациенти кај кои до вчера беше констатирано дека се позитивни на ковид-19, тестовите открија уште седуммина заболени од лицата згрижени во установата, како и еден од вработените кој обавува работни задачи на хигиеничар.

Новите седуммина позитивни се од 29 лица сместени на судско-психијатриското одделение на кои им беа земени брисеви и се очекуваа резултати.

„Сите пациенти се префрлени, изолирани, сите се асимптоматски и се во добра здравствена состојба. Негативните на одделението ќе бидат во 14 деневен карантин. Хигиеничарот се наоѓа во домашни услови и ќе му биде изготвено решение за домашна изолација“, рече Лозановска.

Со претходно заразените во Психијатриската болница има вкупно 26 пациенти со коронавирус, од кои еден починат на ГОБ „8 Септември“ во Скопје и тројца од вработените кои се во домашна изолација. Првата групата со пациенти кај кои претходно беше евдентирана болеста беше изолирана уште од 5 август, а од 20 овој месец ќе се почне со тестирање за да се утврди дали болеста поминала. Медицинска сестра и физичиот работник кои беа во првата група лица позитивни на ковид-19 евидентирани во Болницата се на домашно лекување.

„Во моментов имаме две засебни ковид одделенија во Психијатриската болница. Осум месеци да се менаџира вакви иституција пред предизвикот од пандемијата е навистина стресно. Категоријата е многу тешка, какви и протоколи да се конципираат многу тешко се спроведуваат, пациентите користат заеднички пристории од трпезарија, санитарни јазли, ходници. Дел од нив можете да натерате да носат маска и ракавици, дел не е. Но, ова останува како предизвик пред нас сите како тим да се избориме“, рече директорката.