Хераклеа Линкестис е позната по своите подни мозаици, а сo своите технички, уметнички, иконографски, стилски и симболични карактеристики, се издвојува претставата на мозаикот од нартексот на големата базилика, како извонреден пример на ранохристијанската уметност. Токму тоа e причината, овој мозаик, кој зафаќа површина од преку 100 квадратни метри, да биде прикажан преку тактилна публикација

Тактилната претстава на мозаикот е со димензии 120 х 30 см и истата е изработена на специјална тактилна хартија.

Описниот текст е отпечатен на Брајово писмо, а изработена е и аудио верзија која е поставена на веб страната на НУ Завод и музеј Битола.

Публикацијата е двојазична на македонски и англиски, со намера во иднина истата да биде преведена и на други јазици.

-Со оглед на тоа дека се работи за културно наследство од Македониија кое е уникатно и интересно за публиката од целиот свет, во наредниот период е планирано публикацијата да биде бесплатно диструбуирана до светските библиотеки и здруженија кои имаат можност да изработуваат ваков вид на публикации, велат од Завод и музеј-Битола.

Автор на публикацијата е Јове Парговски , а истата е изработена во рамките на проектот „Ние во музеј“ поддржан од Mинистерство за култура на РМ. Раководител на проектот е Ирена Ружин.

Во изработката на публикацијата помогнаа: Балканска музејска мрежа, Ресурсен центар за ученици со оштетен вид – Битола, Радио 106 Битола, Здружение на слепи лица Битола и стручните соработници Тесалија Жирова и Силвана Петрова Насух. Во текстуалниот дел искористени се делови од публикациите: „Од раката на нашите мајстори – Мозаиците на Хераклеjа Lинкестис 4-6 век“ автор: Србиновски Пецо и „Хераклеја Линкестис – водич“ автор: Гордана Ц. Томашевиќ.

Од битолскиот Завод и музеј најавуваат изложба на тактилни слики и музејски копии за наредната есен.