Битолското обвинителство ќе го расчисти  случајот со тешко повредената жена во градскиот автобус во Битола, откако возачот нагло закочил движејќи се кон улицата „Прилепска“. Жената при наглото кочење на автобусот била простум и паднала на глава при што се здобила со тешки телесни повреди, скршеници на черепот и пршлените, итно хоспитализирана во Битолската болница. Но, првично не било пријавено како реално настанала повредата, туку на семејството му било кажано дека на жената и се слошило и покрај тоа што интервенирала Итната медицинска помош. 

По пријавата од семејството на повредената веднаш е постапено, велат од Битолското обвинителство. 

-Известено е ОЈО и дадени се насоки да се провери пријавата и да се утврди што точно се случило. Полицијата излезе на терен и се преземаат мерки да се расчисти настанот, известија од ОЈО за АПЛА.мк

Денеска во билтенот СВР Битола извести за случајот соопштувајќи официјално дека - На 09.08.2024  година во 20.30 часот во СВР Битола А.Д.(50) од Битола, пријавил дека неговата мајка С.Д.(74) од Битола при пад во автобус на ул.„Прилепска" (Пелагонка 1) во Битола се здобила со тешки телесни повреди констатирани во Клиничка болница Битола. По насока на јавен Обвинител, од страна на полициски службеници од СВР Битола ќе се вршат дополнителни проверки и преземаат мерки за расчистување на настанот.

АПЛА.мк претходно објави https://apla.mk/

Битолчанка на 74 годишна возраст е тешко повредена во главата и хоспитализирана на одделот за Неврохирургија во Битолската болница откако автобус со број 1 кој кружи до Брусничка населба, нагло закочил. Жената со иницијали С.Д од падот се здобила со две скршеници на черепот, повреда на р’бетот и внатрешно крварење, велат од нејзиното семејство. Жената била на отворањето на новиот трговски центар на излезот од Битола, па се качила во автобус за дома, но откако го платила билетот, уште не седната, автобусот тргнал и во еден момент  силно закочил, по што жената иако веќе била до втората излезна врата од автобусот од силината на кочењето паднала наназад на темето по што ги здобила тешките повреди.

Но, она што е интересно во случајот е што на семејството првично му било кажано дека на нивната мајка и’ се слошило, и толку.  Вистината почнала да се отмотува кога битолчанка на една од женските Фејсбук групи прашала  дали некој има информација што се случи со жената во автобусот, па вели –„ Бев внатре кога се случи непријатната случка, помогнав малку и заминав...Не ми излегува сликата од главата, сакам да знам дали е добра?“

По ова семејството дознава дека за повредите на нивната мајка не им била кажана вистината, па случајот самите го пријавиле во полиција. Разговарале и со очевидци на настанот. 

Од СВР Битола за АПЛА.мк вечера потврдуваат дека – „Синот пријавил дека неговата мајка се здобила со повреди во автобус. Констатирани се тешки телесни повреди“, но случајот не е заведен како сообраќајна несреќа бидејќи немало судир меѓу автобусот и друго возило. Случајот ќе се испитува.

Семејството во разговор за АПЛА.мк се прашува – „Зошто првично ни беше кажано дека и' се слошило? Зошто кога возачот повикал екипа на Итната помош не кажал што се случило и од каде се повредите? Зошто воопшто Итната помош кога веќе интервенирала не пријавила во полиција? “

Всушност, велат, да не прашала битолчанката во Фејсбук групата за здравствената состојба на повредената, семејството немало да ја знае вистината. Сега известена е полицијата и се очекува исход од случајот.  

А.Б