„Се запишуваат многу на медицина, ете има и поранешена ученичка од ова училиште која денес е втора година на студии по астрономија во Словенија, потоа на природни и општествени науки, значи за сѐ има интерес. Јазично сме блиски и по култура и менталитет, но и по оддалеченост. Тоа е растојание од 13 часа со возило од Битола, а девет- десет од Скопје. Сите кои од вашата држава студираат во Словенија имаат поголема можности да се вратат дома и да продолжат со работа онаму каде што се родени отколку ако оди човек да студира во Шведска, САД и други подалечени места“, рече амбасадорот Јазбец.

Тој напомена дека во Словенија се правени емпириски истражувања кои покажуваат дека македонските студенти се едни од најдобрите таму. Имаат и можности за да најдат работа.

„Како реултат на тоа студирање во Словенија тројца до четворица најдобри светски експерти за роботика се од Македонија и работат во Словенија на институтот „Јозеф Штефан“, тројца- четворица најдобри уролози на светот се од Македонија , а работат во Словенија. Двајца до тројца светски кардиолози се по потекло од оваа земја, едниот е од Охрид, а работат во Марибор“, рече амбасадорот.

Според него, тоа е доказ за квалитетот на образовниот систем во Словенија. Додаде дека во нивната држава живеат и работат околу 20 000 Македонци, а плус има и 21 000 словенски државјани со македонско потекло, што не се мали бројки, ако се има во предвид малата популација во двете земји.

Амбасадорот своите книги „Сјајна ѕвезда со лавовска грива“ и „Мартон Крпан- дипломат и воин“ ги презентираше пред битолските гимназијалци, во Библиотека каде раководител е Драган Ристевски со кој Јазбец уште на времето заедно студирале во Словенија на новинарство.

„Библиотеката е отворена за секаква соработка со надворешни културни работници и лица од општествениот и политичкиот живот. По втор пат доаѓа Милан Јазбец, а промовира книга поезија и за дипломатијата за Мартин Крпан“, рече Ристевски.

Ж. З.