-Обрембски беше извонреден полски научник кој помина само 8 месеци во македонско Порече истражувајќи ги обичаите и културата на македонскиот народ. Тоа што е презентирано на оваа изложба во Битола е само еден фрагмент на неговите истражувања. Верувам дека е многу интересно за сите жители на Македонија да видат како изгледаше македонско Порече во триесетите години на 20 век. Обрембски живееше меѓу жителите на Порече, и не само што живееше туку ги запознаваше нивните обичаи и беше третиран како еден од нив, што придонесе за квалитетот на тоа што го забележа,  рече Амбасадорот на Полска во Македонија Јацек Мултановски, кој ја отвори изложбата во битолскиот Завод и музеј.

Обрембски, во тој период живеел во селото Волче при што ги проучувал и ги документирал секојдневниот, обредниот и религиозниот живот, митологијата, фолклорот, народната медицина и магиските ритуали.. Собрал материјали, коишто биле обемни и уникатни уште во моментот на нивното регистрирање. Познато е и тоа дека самиот научник развил многу добри односи со жителите на Волче и околните села, ги сакал поречаните, а и тие го сакале него.

-Крајно софистицираниот, одмерен, прониклив, научнички, но многу повеќе , човечки пристап на Јозеф Обрембски во рамките на поречката заедница и начинот на неговата интерпретација сосема оправдано му обебзбедиле трајно место не само во срцата на поречаните, туку му обезбедиле трајно место во македонската, полската и воопшто светската етнологија и антропологија, изјави Мери Стојанова, В.Д. Директор на Завод и музеј Битола