АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Дека најсилна е еманципацијата на жената преку работата потврдуваат Виолета Петковска и Јасмина Мановкса, кои своите работни места во РЕК Битола ги делат со мажи. Специфичните работни услови во најголемиот производител на струја во државата и стожер на електроенергетскиот систем, за овие две млади дами беа силен предизвик, но велат никогаш не им паднало на памет да се откажат поради предрасудите и стереотипите. Виолета е ракувач на погонска станица, а работното време го минува во кабина од неколку метри квадратни од која се следи транспортот на јагленот од рудникот Суводол до Термоелектраната. Оди во смени од по 12 часа.
-Работата не е толку тешка како што изгледа ако постојано се следи процесот на движење на јагленот, а од вид не смее да се испушти ниту траката, без оглед дали има или нема јаглен на неа. Но едно мало невнимание значи голем ризик, вели Виолета Петковска, ракувач на погонска станица
Досега, на своето работно место, Виолета не се соочила со дискриминација по било кој основ и вели дека е одлично прифатена од колегите во РЕК Битола.
-Нема дискриминација во работа, тука работат и мажи и жени. Кога дојдов на работа бев добро прифатена од сите колеги, тоа што сум женско не ми прави никаков проблем и потврдува дека ние жените не сме ништо помалку способни од мажите, вели Виолета.
(фото: Виолета Петковска ракувач на погонска станица во РЕК Битола)
Канцеларијата на Јасмина Мановска е во бараките на ПЕ Рудници на РЕК Битола. И таа тврди дека досега не се соочила со дискриминација на работното место
-По струка сум рударски техничар и затоа сакав да ја работам оваа работа. Работам со увезениот јаглен, ги прегледувам камионите, излегувам на терен. Не е тешко, икако ова се смета за машка работа, жените добро се снаоѓаат, вели Јасмина.
(фото: Јасмина Мановска, вработена во ПЕ Рудници на РЕК Битола)
Виолета и Јасмина, заедно со ситеостанати жени вработени во РЕК Битола, уриваат предрасуди и потврдуваат дека нема машка и женска професија. На Денот на жената-8 Март испратија силна порака жените да ги прифатат сите предизвици и да не се откажуваат од своите желби заради општествени стереотипи кои ги ставаат во подредена положба во однос на мажите.
-Сите предизвици треба да се прифатат, работата е работа, без разлика дали се смета дека е машка или женска, вели Виолета.
-Жените треба да ги прифаќаат сите предизвици, никогаш да не се откажуваат, порача Јасмина.
