Советничката од ВМРО-ДПМНЕ Викторија Христовска на денешната седница изнесе сет мерки за помош на бизнис заедницата во тешката ситуација со ковид-19, за кои рече дека и претходно ги предлагале како советници од опозицијата, но се немало слух, па време е да се стават во функција.

„Намалување на данокот на имот до законскиот минимум, намалување на данокот на пренос на промет на недвижнини од 3 на 2 проценти, што е и законски минимум. Предлагаме намалување на комуналната такса, односно фирмарината да биде на законскиот минимум, знаејќи дека е за сите објекти и дека таму се правеа законски измени, веќе е време да се имплементира. Ослободување од надоместокот за поставување на урбана опрема од 1.1.2020 до 31.12 2020 и ослободување на хотелиерите од плаќање на туристичка такса во истиот период и така знаеме дека туристичката сезона беше крахирана и ова е со цел да им се помогне на хотелиерите“, рече советничката Христовска.

Претседателот на Советот Валентин Груевски одговори дека пакет економски меркии и тоа како се потребни во овој период, но дел се содржани во четвртиот сет на мерки од Владата, а некои донесени и претходно од Советот на Општина Битола.

„Намалување на данокот на имот на минимум, тој данок во Општина Битола е на минимум и не може да оди подолу. Законски е од од 0,1 до 0,3 проценти, Општина Битола во 2005 година кога претседател на Советот беше Зоран Коњановски висината на стапката ја утврди на 0,1 процент, не може помалку. Во однос на преносот на недвижности од 3 на 2 проценти, се работи за променлива категорија во која наследниците од прв ред не плаќаат ваков данок, а наследниците од втор ред го плаќаат минимумот од 2 проценти оти минимумот е од 2 до 4 и од трет ред е три проценти. За комуналната такса како Совет донесовме одлука со која таа е сведена на законскиот минимум 5 денари од метар квадратен и не можеме да одиме подолу, а има важност до 15 ноември. Потоа субјектите ќе поднесуваат посебни елеборати за зимската сезона, а ние имаме можност за следниот период од 6 месеци да ја продолжиме одлуката. Хотелиерите, пак, плаќаат такса само ако имаат гости, ако немаат не“, рече Груевски.

Да се формира посебно тело кое итно ќе ги состани  завојуваните страни за случајот Копанки, побара советникот од Поинаку Иван Чулакоски.

„Крајно време е ова да го средиме и да заврши ова со Копанки оти не се трпи. Формирање на посебно тело кое итно ќе се состани на било каков начин каде ќе се повикаат сите завојувани страни за случајот , значи до ПСК Пелистер, советници,  претставници од Општина Битола, угостителски работници од планинскиот дел на Пелистер и сите оние кои се уживатели на планинскиот спорт и живот во Битола. Дали ќе го крстите ад хок тело или комисија најдобро си знаете. Можеме барем за зимава ако не друго да организираме да ја искосиме тревата на патеката,  да се реновира малку од малку една боја да намачкаме на жичарата и едно собиче затоплено  децата што зимава ќе одат на Пелистер да има каде да се стоплат“, рече Чулакоски.

 Претседателот на Советот Валентин Груевски му одговори дека уште во 2018 година ги повикале претставниците од ПСК „Пелистер“ во чија сопственост е Планинарскиот дом да ги продолжат преговорите со Општина Битола за изнаоѓање на меѓусебно прифатливо решение.   

„Морам да потсетам дека Советот на Општина Битола на 20.6.2018 година донесе заклучок за започнување на постапка за изнаоѓање на решение за обнова на Планинарскиот дом Копнаки. Го гласавме сите и во него напишавме дека Советот на Општина Битола заклучува дека треба да се најде начин за обнова на Копанки. Советот на Општина Битола се обврзува дека ќе обезбеди средства во износ од 100 000 евра за обнова на Копанки. Советот на Општина Битола го повикава ПСК Пелистер да продолжи со разговорите со градоначалникот на Битола за градење на заемно прифатливи услови поврзани околу изградбата на Планинарскиот дом Копанки во интерес на општото добро. Општина Битола во овој момент нема законска можност за вложување во Домот зашто стопроцентен сопственк е ПСК Пелистер“, потсети Груевски на заклучокот.

Тој уште додаде дека околу легализација на Домот (постапка спорведена во времето на екс градоначалникот Владимир Талески) се води суски спор, па   се додека тој не заврши и не се произнесе  Управниот суд нема основа за нови заклучоци.

Откако претседателот на Советот Валентин Груевски ја предупреди советничката од Поинаку, Габриела Илиевска, да се држи на темата, а да не зборува за коментари што ѝ беа кажани за време на паузата, таа му возврати: „Вас колега ќе ви остане да предупреувате само уште неколку месеци, а потоа ќе ви заврши политичката кариера“. Груевски ѝ рече „Вие да не се грижите за тоа“, а Илиевска му одговори „ич не се грижам, ќе куртулиме“.

Ваквата препирка настана на вчерашната седница откако на паузата еден од советниците на Илиевска ѝ рече дека се е според заслугата, па таа за време на дискусијата кажа дека ако е според заслугата некој нема да земи паушал.

Тогаш Груевски ја прекрати велејќи ѝ да не зборува за приватни работи, на што таа возврати со цитираните зборови.

Ова се случуваше за време на дискусијата за парите што општината треба да го плати за судски спор од времето на екс градоначалникот Владимир Талески.